Америк дахь Монгол оюутны холбоо “Америкт Оюуны Хүчээрээ Суралцацгаая” уриан дор өдөрлөг өнөөдөр МУИС-н хичээлийн II байрны А зааланд 14:00-17:30 цагийн хооронд болно. Энэхүү өдөрлөгийн хүрээнд Америкийн шилдэг их дээд сургуулиудад тэтгэлэгтэйгээр суралцах боломжууд болон бусад сэдвүүдээр асуулт хариулт бүхий илтгэлүүдийг хэлэлцүүлэх гэнэ. Түүнчлэн, гадаадын нэр хүндтэй 21 их, дээд сургуульд элсэн орсон Монгол оюутнуудын санал бодол, зөвлөмжийг сонсох боломжтой юм. Сонирхуулахад, Америк дахь Монгол оюутны холбоо өнгөрсөн жил байгуулагдсан бөгөөд удирдах зөвлөлийн гишүүнээр “Wesleyan University”, “Columbia University”, “Harvard University”, “Mount Holyoke College”, “MIT” зэрэг их сургуулиудын Монгол оюутнуудын төлөөлөл байдаг бөгөөд одоогоор 60 гаруй оюутныг нэгтгэжээ. Тэдний эхний үйл ажиллагаагаа 2012 оны өвөл Монголын ерөнхий боловсролын 11 дүгээр ангийнхны дунд “Америкт хэрхэн тэтгэлэгтэйгээр суралцах болон Монгол залуус бидний давуу талууд” гэсэн сэдвүүдээр илтгэл тавин эхлүүлсэн байна.
Д.Ундрах
