Энэ долоо хоногт МАХН-ын дарга, экс ерөнхийлөгч Н.Энхбаярын шүүх хурал товлогдов. Өмнө нь хоёр ч удаа хойшлогдсон түүний хурлыг энэ удаа болох болов уу гэтэл дахин хойшлогдлоо. Харин энэ удаад хойшлогдсон шалтгаан нь түүний өмгөөлөгч Б.Оюунбилэг УИХ-д нэр дэвшиж байгаа учир хуралд ирэх боломжгүй гэв. Хэдийгээр энэ сарын 21-ны хүртэл хойшлуулсан ч өмгөөлөгч нь нэр дэвшиж байгаа хойно ирэх пүрэв гаригт товлогдсон хуралд дахин энэ шалтагаа тоочин ирэхгүй байх магадлал бий.
Н.Энхбаярын шүүх хурал урьд хойчид болж байгаагүй сүрийг үзүүлэв. 10.00 цагаас товлогдсон шүүх хурал болоход 30 минутын өмнө Сүхбаатар дүүргийн шүүхийн гадна 150 гаруй хүмүүс цугласан байлаа. Тэднийг эмх замбараагүй байдал үүсгэхээс сэргийлж, цагдаагийн гурван давхар хамгаалалт гарсан байв. Энэ мэт Н.Энхбаяртай холбоотой хэргүүд үргэлж олны анхаарлыг татаж, олны төвд байсаар.
Мөн энэ долоо хоногт УИХ-ын гишүүн Х.Баттулгын заргаа авсан нь онцлох үйл явдлын нэг байв. Тэрээр “Монголын үнэн” сониныг өөрийнх нь нэр төрд халдсан, гүтгэсэн хэмээн 100 сая төгрөг нэхэмжлээд байсан. Харин уг хэргийн шүүх хурал өнгөрсөн пүрэв гаригт болж, шүүх бүрэлдэхүүн “Монголын үнэн” сониныг УИХ-ын гишүүн Х.Баттулгын нэр төрд халдаж, гүтгэсэн буруутай гэж үзсэн юм. Тиймээс тус сонин УИХ-ын гишүүн Х.Баттулгаас уучлал гуйж өөрийн болон өдөр тутмын гурваас доошгүй сониноор залруулга гаргахаар болсон билээ. 
Түүнчлэн бага насны охин хүчирхийлж, бэлгийн дус хүслээ зүй бусаар хангасан Ч.Отгонбаярын шүүх хурал шүүгч байхгүй гэх шалтгаанаар хойшиллоо. Учир нь хурлыг даргалагч шүүгч Ч.Хосбаяр хөдөө сургалтаар явсан учраас ийнхүү тодорхойгүй хугацаагаар хойшлоод байгаа юм.
Мөн тус өдөр төрийн эрхийг хууль бусаар авахыг завдсан хэмээн цагдан хорих 461 дүгээр ангид хоригдож буй найруулагч СТА Г.Бадамрагчаагийн ах болон найзууд нь мэдээлэл хийв. Тэд хуулийн байгууллага хууль бус ажиллаж, хууль бус шийдвэр гаргаж байгаа талаар мэдээлсэн юм. Мөн ТЕГ-ын байцаагч дүүг нь цаазаар авна хэмээн сүрдүүлсэн, хүчээр байцаалт авч хэрэг тулгаж байгаа талаар дурьдав. Түүнчлэн жүжигчин Н.Дорждагва “Н.Энхбаяр, Ц.Нямдорж нарын эргүүлээгүй төрийг Г.Бадамрагчаа яаж эргүүлэх вэ. Зурагтаар “Шударга байя л даа” хэмээн ярьдаг нөхөр өөрөө шударга байгаач ээ.” хэмээн онцолсон билээ. Б.Чимэг
