Өнөөдрөөс эхлэн МАХН-МҮАН-ын "Шударга ёс" эвслийнхэн Үндсэн хуулийн цэцийн байрны гадаа жагсахаар болжээ. Тус эвслээс нэр дэвшсэн зургаан хүнийг СЕХ бүртгэхгүй гэдгээ мэдэгдсэн. СЕХ-ны энэ шийдвэр нь Үндсэн хуулинд заасан хүний сонгогдох эрхийг ноцтойгоор зөрчсөн үйлдэл болсон гэж тэд үзэн Үндсэн хуулийн цэцэд гомдол гаргасан юм. Гэсэн ч өргөдөл гаргаад долоо хоног өнгөрсөн ч ямар нэг хариу өгөөгүй, хэлэлцэх товоо ч гаргаагүй байгаа аж. Тиймээс "Шударга ёс" эвслийнхэн дараах уриалга, лоозонг дэвшүүлжээ.

1. Үндсэн хуулийн цэц Үндсэн хуулийн үзэл санаа, ардчилал, эрх чөлөө, хүний эрхийг иргэддээ эдлүүлдэг шударга үйлсийн найдвартай манаач байх ёстой!

2. МАХН-МҮАН-ын “Шударга ёс” эвслээс нэр дэвшигчид Үндсэн хуулиар олгогдсон сонгогдох эрхээ эдлэж чадахгүй байна!

3. “Шударга ёс” эвслийн нэр дэвшигчдээс Үндсэн хуулийн цэцэд хандаж гаргасан өргөдөл хүсэлтийг нэн даруй шийдвэрлэж өгөхийг шаардаж байна!

4. Үндсэн хуулийн цэц үнэн зөв шийдвэр гаргана гэдэгт бид итгэж байна!

5. 2012 оны УИХ-ын сонгууль хаяанд ирлээ. “МАХН-МҮАН Шударга ёс эвсэл”-ээс нэр дэвшигчдийн хүсэлтийг шийдвэрлэхгүй яагаад удаад байгаа юм бэ?

6. Үндсэн хуулийн цэц хэнээс ч хараат бус бие даасан байгууллага, шударга үнэний дуу хоолой гэж Монголын ард түмэн итгэж байгаа шүү!