“Ардчиллын гал олуулаа асч байна” гэдэг шиг бас авилгалын гал олуулаа асч байна шүү. Болгоомжтой л байж үзээрэй хүмүүс минь. Учир нь энэ удаагийн сонгуульд ялагдахаа мэдэрч эхэлсэн коммунистууд сандарч эхэллээ. Бүр Засгийн газар нь сандарч байгааг харав уу. Зүв зүгээр явж байсан иргэддээ сонгуулиар сая 500  мянган төгрөг өгнө гэж амалчихаад амлалтаа биелүүлэхийн төлөө мөнгө өгчихөөд дараа нь түүнийгээ эргүүлээд нэхдэг байна шүү. Бод доо.

    Оюутнуудад сургалтын төлбөр хэмээн өгсөн мөнгөө одоо тэдний эзэмших ёстой 1072 ширхэг хувьцаанаас хасч тооцно гэх юм. Хэрвээ тэгэх байсан бол иргэнээсээ асуух ёстой биш үү. Муусайн юмнуудаас асуух юу байхав гэж бодоод оюутнуудыг хувьцааг хусчих нь тэр. Гэтэл булхай нь баригдангуутаа “ За за тэгвэл тэр мөнгөө эргүүлж авчирч өгөөд хувьцаагаа ав“ гэдэг байгаа. Гуйгаагүй байхад хүчээр өгчихөөд оронд нь хувьцааг нь хулгайлах гээд бүтэхгүй болохоор нь мөнгөө нэхлээ дээ, цаадуул чинь. Одоо оюутнууд яаж ч хичээгээд  тэр мөнгийг нь олж аваачиж өгч чадахгүй нь тодорхой.  Ингээд хөөрхийс Засгийн газарт өртэй болж таарав.

    Гэхдээ тэдэнд бас сонголт бий. Өрөө өгөхгүй ч байж болно. Өгөхгүйн тулд хувьцаагаа  МАН-ын Засгийн газарт “бэлгэлэх”. Сайн бодож олсон тун няхуур заль. Хөгжлийн бэрхшээлтэй болон өндөр настангууд ч энэ мэхэнд оров. Эхлээд тэднийг хувьцаагаа  Засгийн газарт зарчих гэв. Зөвшөөрлөө. Өдрийн хоолоо арайхийн залгуулж байгаа хүмүүст сая төгрөг бол их мөнгө. Ингээд хувьцааг нь худалдаж авах нэрийдлээр урьдчилгаа гэж 330 мянган төгрөг өглөө. Үлдсэнийг нь сонгууль дуусахаас өмнө өгнө гэж ам гарав. Ингээд сонгууль эхэлмэгц  ард иргэд нь МАН-аас “Та нар бидэнд амалсан сая 500 мянган төгрөгөө яасан гээд асуугаад эхлэх нь тэр. Нөгөөдүүл нь бид өгсөн биз дээ. Урьдчилгаанд нь 330 мянган төгрөг өгсөн. Одоо үлдсэнийг нь өгөх л гэж байна” хэмээн зандарав. Хүүе ээ, ямар аймаар луйвар гээч вэ. Бод л доо. Би Доржид нэг сая 500 мянган төгрөг өгөх ёстой. Өртэй.

    Гэтэл Доржийн машин надад  таалагдсан учраас би машиныг нь сая төгрөгөөр худалдаж авахаар болов. Дорж яахав юм үзээгүй юм болохоор тийм хямдхан өгчихөж байгаа хэрэг. Би машиныг нь ердөө сая төгрөгөөр аваад 20 , 30 сая төгрөг хүргэж зарахаа бас мэднэ. Ингээд би Доржид сая төгрөгөө өгөхгүйгээр 330 мянган төгрөгийг нь өгчихлөө. 670 мянгыг нь наадмаас өмнө өгнө гээд. Гэтэл нэг өглөө Дорж ухаан орсон юм байлгүй надаас урьдны өр болох сая 500 мянган төгрөгөө нэхдэг байгаа. Тэгэхээр нь би өөдөөс нь “Би өгөх л гэж байна даг. Саяхан чамд 330 мянган төгрөг өгсөн биз дээ. Тэр сая 500 мянгаасаа хасч тооцоорой тэнэг минь” гэлээ. Гэтэл Дорж яасан гээч. Надад хууртсангүй. “Нэг сая 500 бол чиний надад төлөх ёстой өмнөх өр. Харин сая төгрөг бол миний машины үнэ” гэж байна. Тэгэхээр нь миний  уур хүрээд “Тэгвэл чи миний өгсөн 330 мянган төгрөгийг буцааж өгөөд энэ муу ямбий машинаа ав” гэлээ.
   
    Дорж чадахгүй л дээ. Тэр мөнгөө үрчихсэн юм чинь. Эхнэр нь хэзээ мөдгүй төрөх гэж байгаа. Өөрөө тахир дутуугийн группд байдаг юм чинь 330 мянган төгрөг олж ирээд надаас машинаа автал өдий.  Харин түүнийг яая даа гэж байх зуур би хажуу айлын Дугармааг хэмх панаалдаад байр авах гэж хадгалсан мөнгийг нь аваад Доржид өгчихнө. Дугармаад юу гэж хэлэх вэ гэхээр  “Найз нь чиний мөнгийг банкнаас өндөр хүүтэй зээлье. Би Хадгаламж зээлийн хоршоо байгуулах гэж байгаам. Их мөнгө хүүлэх учраас чиний мөнгийг сарын дотор 20 дахин өсгөөд өгнө” гэж хэлээд л туучихна шүү дээ. Дараа Дугармаагаас  зугтах юухан байхав дээ. Манайх эндээс нүүгээд явчих юм чинь.  Иймэрхүү л явган залийг энэ Засгийн газар хэрэглэж байна. Хуурч хулхидах бол коммунистуудын хожуу ч гэлээ сайтар сурсан зан шүү дээ. Хэрвээ хажуу айлын Дугармаа хулхидуулахгүй бол гишүүд дэмжигчид гэсэн нэрийн дор байх хэдэн компанийн  захирлууд болон төрийн өмчит компанийн удирдлагуудыг зовоох болно.

    Тэд яг Гаалийн Х.Баатар шиг намдаа мөнгө “хандивлаж” байгаад шоронд орж мэдэх юм. Ай хөөрхий, ингээд бодохоор авилгалын гал олуулаа асч байгаа хэрэг. Энэ их аймшигтай дүрэлзсэн авилгалын галыг цурманд оруулах эсэх нь биднээс шалтгаална даа. МАН-ын олон гишүүн дарга нар АТГ-т шалгагдаж байгаа. Бас НИТХ-ын дарга Билэгт нь хүртэл эрэн сурвалжлагдаад хагас жил боллоо. Тэгэхээр авилгалын гал тун ч олуулаа дүрэлзэж байгаа энэ намаар дахин төр бариулна гэж бодохоор эх орноосоо явчихмаар санагдах юм даа.