Сангийн сайд Д.Хаянхярваагийн хэлж байгаагаар 1.2 сая иргэн хувьцаагаа бэлэн мөнгөөр авах хүсэлт гаргажээ. Тавантолгойн хувьцааныхаа оронд нэг сая төгрөг авъя гэсэн өдий хүн байна аа гэсэн үг ш дээ. МАН-ынхан энэ нэг сая төгрөгийг сонгууль дуусахаас өмнө буюу энэ зургадугаар сардаа багтаан өгнө гээд ам гарчихсан байгаа. 330 мянгыг нь өгсөн гээд тооцвол зургадугаар сард 670 мянган төгрөгийг 1.2 сая хүнд өгч дуусгах нь ээ… 1.2 сая хүнд очих 1.2 триллион төгрөг. Гэхдээ энэ мөнгийг хэрхэн олгох, хөрөнгийг нь хаанаас босгох нь тодорхойгүй гэдгийг онцолъё.
Хэрвээ… МАН энэ сонгуульд ялахын тулд бүх арга мэхээ хэрэглэн бэлэн мөнгөө тарааж дуусна гэвэл яах вэ?  Хэрвээ….Хэрвээ…. Хэрвээ.

  Энэ бүхэнд хариулт ердөө л ганц. Нөгөө бидний нэг их ойлгодоггүй хэрнээ алхам тутамд халаасан дахь мөнгөтэй минь хамт, ходоодонд ордог хоолтой минь цуг явж л байдаг инфляцыг Монголбанкныхан ч хазаарлаж чадахаа байна. Бэлэн мөнгө ихээр тараах инфляцыг яаж хөөрөгддөгийг өнгөрсөн хугацаанд бид хангалттай амссан. Эх орны хишиг сар бүрийн 21 мянган төгрөг тарааж эхлэхээс өмнө бид өглөө бүр атар талхаа 550 төгрөгөөр худалдан авдаг байлаа. Цайгаа чанах сүүгээ 1200-гаар авчихдаг байлаа. Харин одоо бол талхаа 720 төгрөгөөр, сүүгээ 1800-гаар авдаг болчихож. Статистик үзүүлэлтээр 21 мянгыг тарааснаас хойш хүнсний бүтээгдэхүүний үнэ 26 хувиар өссөн гэсэн тооцоо гарсан байна лээ. 21 мянгыг бэлнээр нь өгөхөд ингэж байгаа юм чинь нэг сая төгрөг энэ богино хугацаанд тараана гэвэл инфляц гээч эдийг яаж хөөрөгдөх нь тодорхой байгаа биз. Монголбанкныхан  инфляцыг онилж, бодлогын хүүгээ нэмсээр байгаа ч өнөө гайхал нь 13.5 хувьд аль хэдийнэ хүрчихсэн байгаа. Тэгвэл инфляц өсөхөөр яадаг вэ гэхээр хамгийн нэгдүгээрт бид өглөө бүр гурван зүсэм талх иддэг байсан бол ганцхан зүсмээр цадахаас өөр аргагүй болно. Арай өргөн утгаар нь харвал арилжааны банкууд зээлээ хумиж, жижиг, дунд бизнес эрхлэгчид элгээрээ хэвтэнэ. Уг нь хэдхэн монополь шатахуун импортлогчид, үүрэн телефоныхон биш, жижиг дунд үйлдвэрлэгчид л улс орныг хөгжүүлнэ гэдэг биз дээ.

   Тэгвэл инфляцыг ингэтэл хөөрөгдөж байж өгөх гээд зүтгээд байгаа 670 мянган төгрөгийг эрх баригчид хаанаас санхүүжүүлэх вэ. Одоогоор бол санхүүжүүлэх эх үүсвэр нь тодорхой бус гэдгийг дээр хэлсэн. Гэсэн ч эрх баригчдын дунд ийм нэгэн яриаг ажил хэрэг болгохоор их л шуурхай хэлэлцэж байгаа бололтой. Тэр нь хувьцаа авахгүй гэсэн хүсэлтээ гаргасан 1.2 сая иргэнд олгох 670 мянган төгрөгөө Хөгжлийн банкнаас санхүүжүүлэхээр болсон тухай. Хөгжлийн банкин дахь мөнгө гэдэг нь төмөр замын төслийг санхүүжүүлэх мөнгө гэдгийг уншигчид андахгүй биз ээ. Өөрөөр хэлбэл, төмөр замыг санхүүжүүлэхийн оронд хувьцааны оронд олгох мөнгөө өгөхөөр эрх баригчид шийдвэрлэх гэж байгаа сурагтай. Тэгвэл Тавантолгойн хувьцааны оронд төмөр замаа тавьж туучихаад танц бүжиглэх болох нь ээ?

   Үгүй ээ, энэ бүхнийг монголчууд хүсэхгүй. 1.2 сая хүнд очих 670 мянган төгрөг салхинд хийсэхийг үзмээргүй байна. Нэмүү өртөг шингэсэн уул уурхайн бүтээгдэхүүнээ бусдаас хамаарахааргүйгээр өөрийн төмөр замаар дэлхийн зах зээл дээр хүргэхийг хармаар байна. Төмөр замтайгаа үлдэх үү, 670 мянган төгрөг авах уу.

2012.06.18  Үндэсний шуудан