МАХН-ын дарга Н.Энхбаярын шүүх хурал нөгөөдөр буюу ирэх пүрэв гаригт болно. Түүний шүүх хурал өмнө нь гурван удаа товлогдсон ч тодорхой шалтгааны улмаас хойшлоод буй.Харин хоёрхон хоногийн дараа болох уг шүүх хуралд Н.Энхбаяр огт санаа зовохгүй байгаа бололтой. Нэг нь 100 хуудастай 49 хавтаст хэргээс гуравтай нь л танилцаад буй хэмээн мэдэгдэж байсан тэрээр одоо ч хавтаст хэрэгтэйгээ танилцаагүй гэнэ.
Хэдийгээр тэрээр УИХ-ын сонгуульд нэр дэвших эрхгүй хоцорсон ч МАХН-МҮАН-ын “Шударга ёс” эвсэлээс нэр дэвшигчдийг дэмжин хөдөөгийн тойргуудад ажиллаж байгаа. Саяхан Сэлэнгэ, Дархан-Уул, Булган, Өвөрхангай, Орхон, Архангай зэрэг аймгуудаар явж, сонгогчидтой уулзсан юм. Улс төрийн ширүүн тэмцлийн гол баатар болоод буй түүнийг ирэх сургаар иргэд хөл тавих зайгүй болтлоо цуглан, хүлээн авч уулзжээ.
Намын дарга хүний хувьд сонгуулийн ажилд анхаарал хандуулах нь чухал ч шүүхийн танхимд дуудагдаад байгаа нь илүү чухал баймаар. Гэтэл Н.Энхбаяр шүүх хурлаа тоохгүй байгаа нь илт. Түүнийг долоон тэрбумын хэргээр бүлэглэн үйлдсэн хэмээн гурван хүнтэй хамт Эрүүгийн хуулийн 150.3, 263.2-т заасан хүндэвтэр зүйл ангиар буруутгагдаад буй. Хэрвээ шүүхээр гэм буруутай нь тогтоогдвол бүх эд хөрөнгөө хураалгаж, 5-10 жил хорих ялаар шийтгүүлнэ. Гэвч энэ бүхэн Н.Энхбаярт огт хамаагүй. Харин сонгуульд МАХН-МҮАН-ын “Шударга ёс” эвсэл ялах нь л чухал бололтой.
Б.Чимэг
