МАХН-ын дарга Н.Энхбаярын шүүх хурал энэ пүрэв гарагт болохоор товлогдоод байсан. Гэсэн ч Н.Энхбаярын тавьсан хүсэлтийн дагуу УИХ-ын сонгуулийн дараа буюу долдугаар сард болохоор хойшлогдсон талаар Сүхбаатар дүүргийн шүүхээс албан ёсоор мэдэгдлээ.
   Өчигдөр МАХН-ын дарга Н.Энхбаяр Сүхбаатар дүүргийн шүүхэд өөрийн биеэр очиж хүсэлт гаргажээ. Уг хүсэлтдээ "Миний түрүүчийн шүүх хуралд оролцохдоо сонгож авсан  өмгөөлөгч Б.Оюунбилэг нь УИХ-ын сонгуульд Говь-Алтай аймагт нэр дэвшиж, аймагтаа  ажиллаж байгаа тул шүүх хуралд оролцож, хэргийн материалтай танилцах эрхзүйн туслалцаа үзүүлэх боломжгүй болсон тухай мэдэгдсэн. Тиймээс би Б.Оюунбилэг өмгөөлөгчөөс татгалзаж, өмгөөлөгч Б.Сарангэрэлийг сонгосон. Нэгэнт шинэ өмгөөлөгч оролцох болж байгаа тул түүнийг хэргийн материалтай танилцуулах боломжоор хангаж өгнө үү. Шүүхээс өгсөн хугацаанд хэргийн материалтай бүрэн танилцаж дуусна" гэжээ.
    Иймд Сүхбаатар дүүргийн шүүхээс түүний гаргасан хүсэлтийг хүлээн авч, өмгөөлөгчийг хэргийн материалтай танилцах боломжоор ханган хуралдааныг хойшлуулсанаа мэдэгдлээ. Шүүх хурлыг долдугаар сарын эхээр товлоно гэв.
    Өмнөх удаад товлогдсон шүүх хуралд МАХН-ын дарга Н.Энхбаяр хурлыг хойшлуулах хүсэлтийг гаргахдаа сонгуулийн дараа товлож өгөөч ээ хэмээн шүүх бүрэлдэхүүнээс хүсч байсан. Гэвч улсын яллагч Е.Сагсай уг хүсэлтийг хүлээн авахгүй гэдгээ мэдэгдсэнээр шүүх бүрэлдэхүүн ирэх пүрэв гариг хүртэл хойшлуулаад байсан билээ. Харин Н.Энхбаяр өмгөөлөгчөө дахин сольсноор зорьсондоо хүрч, хурлыг сонгуулийн дараа хийхээр болжээ.