Энэ сарын 6-нд Налайх дүүрэгт үйл ажиллагаагаа явуулдаг “Топ” тоосгоны үйлдвэрийн хятад эзэд 16 настай Монгол хүүхдийн хөлийг хугартал зодсон хэрэг гарсан. Түүний зүүн хөлний шилбэний ясыг чулуугаар бяц цохисон учраас өнгөрсөн долоо хоногт хүнд хагалгаанд орон ГССҮТ-д хэвтэн эмчлүүлж байгаа юм. Хэдийгээр хагалгаанд орсон ч хөл дээрээ явах магадлал бага байгаа хэмээн эмч нар хэлсэн билээ. Түүнийг зодсон БНХАУ-ын иргэн Lang Ruizhang-г эрүүгийн хуулийн 96.1-т бусдын бие махбодид хүнд гэмтэл санаатай учруулсан, өөрөөр хэлбэл амь биед нь аюултай гэмтэл учруулсан буюу хараа, сонсголгүй болгосон, эрхтнээс нь хагацуулсан, ажиллагаагүй болгосон, нүүрийг засаршгүй эвдэж дүрсийг алдагдуулсан, хүүхэд дутуу гаргуулсан буюу ураг зулбуулсан, сэтгэцийн өвчтэй болгосон, түүнчлэн хөдөлмөрийн чадварыг бүрмөсөн алдагдуулсан зааснаар буруутган шалгаж эхэлжээ.
Мөн энэ сарын 7-нд цагдан хорих 461 дүгээр ангид саатуулсан байна. Хэрвээ гэм буруутай нь тогтоогдвол таваас дээш долоон жил хүртэл хугацаагаар хорих ял шийтгэх юм.
Хүү энэ жил Налайх дүүргийн “Эрдмийн оргил” сургуулийн есдүгээр ангийг төгссөн байна. Тэрээр сургуулийнхаа шилдэг хүүхдээр шалгарсан, сагсан бөмбөг болон волейболын шигшээ багт тоглодог байжээ.
Б.Чимэг
