Шинэ Улаанбаатарын төлөөх залуусын “I Love New UB” клубээс онлайн хэлэлцүүлэг зохион байгуулах гэж байна. Нийслэлийнхээ хөгжил дэвшилд залуус хувь нэмрээ хэрхэн оруулж, хотын шинэ өнгө төрх, шинэ кодыг тодорхойлохыг зорилго чиглэлээ болгосон “I Love New UB” клубын үйл ажиллагааг дэмжигч мянга мянган залуус өөрсдийн саналаа илгээсээр байгаа билээ.
Үүнээс гадна орчин үеийн залуучуудын байнгын хэрэглээ болсон интернэтийг ашиглан цахим ертөнцөд тогтмол идэвхтэй байдаг залуусын дуу хоолойг энэ хэлэлцүүлгээрээ сонсож, үйл ажиллагааныхаа чиглэлд тусгах юм. Тус клуб “My UB-Гоё хот” буюу тавтай тухтай орчинтай сайхан хоттой болох, стрессгүй жаргалтай амьдархыг хүссэн “Smile in UB”, орчин үетэйгээ хөл нийлүүлэх хүсэлтэй залуусын “UB never sleeps” уриалгыг гарган тавьж байгаа. Иймээс маргааш буюу зургадугаар сарын 20-ны 20:00 цагт болох онлайн хэлэлцүүлэгт эдгээр сэдвээр халуун яриа өрнүүлж, үзэл бодлоо хуваалцаж, хөгжлийн төлөө санаачлагад хувь нэмрээ оруулаарай залуус аа.
Нийслэлдээ хайртай залуус биднийг онлайнаар уулзуулах хаяг www.new-ub.mn. Онлайн хэлэлцүүлэгт зочноор “I Love New UB” клубын үйл ажиллагааг дэмжигч дуучин Quiza, шог зураач С.Цогтбаяр нар оролцоно.
Мөн ойрын үед “I Love New UB” залуусын клубээс санаачлан Улаанбаатар хотод байрлах хөшөө, дурсгалын газруудтай танилцах, тэдгээрийн түүх, соёлыг агуулгыг таниж мэдэх, хөшөө, дурсгалын газруудыг болон түүний ойр орчмын газруудыг цэвэрлэх “UB-Дурсгал тур” хүндэтгэлийн аяллыг зохион байгуулахаар болжээ.
