Бoкс: Америкийн боксчин Флойд Мэйуэзер "Форбс" сэтгүүлээс жил бүр гаргадаг, дэлхийн хамгийн өндөр орлоготой 100 тамирчны жагсаалтыг тэргүүлжээ. Тус сэтгүүлийн тооцоолсноор, 2011 оны зургадугаар сараас 2012 оны зургадугаар сарын хооронд Мэйуэзер 85 сая долларын орлого олсон байна. Энэ хугацаанд Мэйуэзер нэг цаг хүрэхгүй хугацаанд үргэлжилсэн ердөө хоёрхон тулаан хийжээ.Жагсаалтын хоёрдугаарт, Филиппиний боксчин Мэнни Пакиао оров. Тэрбээр нэг жилийн хугацаанд 62 сая долларын орлого олсон байна. Дэлхийн шилдэг боксчид болох Мэйуэзер болон Пакиао жингээсээ үл хамааран хоорондоо хүч үзэхийг нэг бус удаа оролдож байсан боловч зөвшилцөж хараахан чадаагүй ажээ.
Гольф: 2001 оноос хойш "Форбс" сэтгүүлийн энэ жагсаалтыг тасралтгүй тэргүүлж ирсэн гольфчин Тайгер Вудс энэ удаа гуравдугаарт орсон байна. Өнгөрсөн нэг жилийн хугацаанд тэрбээр 59,4 сая долларын орлого олсон нь нэг жилийн өмнөх үзүүлэлтээс 16 сая доллароор бага байгаа аж. Түүний 2009 оны үзүүлэлттэй харьцуулахад Вудсын орлого хоёр дахин буурчээ.
Сагсан бөмбөг: Сагсан бөмбөгчин Леброн Жеймс 53 сая долларын орлого олсон үзүүлэлтээр жагсаалтын дөрөвдүгээрт орсон байна. Тавдугаарт 52,7 сая долларын орлого олсон теннисчин Рожер Федерер оржээ.Дэлхийн хамгийн өндөр орлоготой тамирчдын жагсаалтын эхний аравт сагсан бөмбөгчин Коби Брайант /52,3 сая долларын орлого олсон/, гольфчин Фил Микельсон /47,8 сая доллар/,
Хөлбөмбөг: Дэвид Бекхэм /46 сая/, Криштиану Роналду /42,5 сая/, америк хөлбөмбөгчин Пэйтон Мэннинг нар багтсан байна.
Эмэгтэй тамирчин: Уг жагсаалтад хоёр эмэгтэй тамирчин багтсаны нэг болох Оросын теннисчин Мария Шарапова нэг жилийн хугацаанд 27,6 сая долларын орлого олсон үзүүлэлтээр жагсаалтын 26 дугаарт оржээ. Нөгөө эмэгтэй тамирчин нь Хятадын теннисчин Ли На аж. Тэрбээр 18,4 сая долларын орлого олж, жагсаалтын 81 дүгээрт орсон байна. Д.Ундрах
