Сонгуулийн сурталчилгаанд урлагийн тоглолт, шоу цэнгээн зохион байгуулахыг хориглосон тул энэ жил намуудын реклам арай өөр өнгө аястай болж байна. Намууд олны танил хамтлаг дуучдыг цуглуулж нүсэр том дууны клип хийдэг байдал ч өөр болжээ. Өмнө нь МАН-ын хувьд 2004 оны сонгуулиар оддын дуулсан “Амин хайрын эх орон”, 2008 онд “Өглөө шиг эх орон” дууг захиалгаар хийлгэж байсан. Зурагт, радио, гудамж талбайгаар нэг цангинах дууг өөрийн эрхгүй даган дуулах хүмүүс олон байв. АН-ын хувьд дуу хууранд тэгтлээ их ач холбогдол өгдөггүй байсан ч энэ жил харин АН-ын логотой клип хүчээ авлаа.
  АН, МАН-ын сонгуулийн сурталчилгаа “бөмбөгдөж” байгаа энэ өдрүүдэд хүмүүст хамгийн их хүрч, онцгойрч байгаа нь “Нар” клип юм. Никитон хамтлагийн 2009 онд дуулж байсан энэ дуу сонгуулийн буянаар клиптэй боллоо. Энэ дуу “Никитон” хамтлагийн “Нандин шүтээн”, “Янаг цэцэг” шиг амнаас ам дамжин дуулагдалгүй  хав дарагдаж үлдсэн байсан ч АН-ын лого, АН-ын мессежтэйгээр олон нийтэд хүрээд байна.
   Өмнө нь МАН-ын сонгуулийн сурталчилгааны дуунууд эх орноо магтсан, гэгээлэг байдаг байсан бол АН өөр өнцгөөс харж “Нээрээ бид чинь яаж амьдарч байгаа билээ?” гэж олон хүн өөрийн эрхгүй бодоход хүргэсэн аж. Клипэнд гардаг шиг авлигалд тэгтлээ их идэгдсэн үү, залуучуудын хүсэл, эрэмлзлийг тийм ихээр боогдуулан хорьж байна уу” гэж цөөнгүй хүн эргэцүүлж эхэлжээ.
      Харин өнгөрсөн жилүүдэд парламентад олонхи болж, Засгийн газрыг бүрдүүлж байсан МАН-д энэ нь хүндээр тусч, сөрөг сурталчилгаа хийхээр бэлдэж эхэлжээ.
   “Нар” дууны клип өрнөлтэй, үзүүштэй болсон ч зарим хүн нэг өнцгөөс, бараан талаас нь харуулсан клип болсон гэж үзэж байгаа юм. Өчигдөр гэхэд зарим ахмад багш хэвлэлийн бага хурал зарлаж “хүүхдүүдэд буруу дууриал үзүүлж, багш нарын нэр хүндэд халдсан” гэж мэдэгдэв. Сургуулийг “элээ хэрээ эргэлдсэн түгшүүрийн газар, багш нарыг сурагчиддаа хэрцгий харьцдаг” гэж харуулсанд бухимдаж байгаагаа хэлсэн. Ялангуяа багш нь шавийнхаа үзэж буй зүйлийг урж тасдан хүүхдийн эрхийг зөрчиж байгаа нь муу үлгэр дууриал өгнө гэж тэд үзжээ. Мөн клипэнд залуучуудыг цагдаа нарын эсрэг босч байгаа 2008 оны долдугаар сарын нэгэнд болсон үйл явдал шиг дүр зургийг харуулсан нь хүчирхийлэлд уриалан дуудсан хэрэг ч гэх нь байв.
   ИЗНН-ын хувьд ч “Харанга” хамтлагийн 2002 онд гаргаж байсан “Хамгийн сүүлчийн” гэх бараан утгатай дууг мөн л клиптэй болгон цацаад байгаа. Энэ мэт сонгуулийн санал хураалтын өмнөх цөөн хоногт намууд сурталчилгаагаар “байлдаж” эхлээд байна.