“МИАТ” компанитай төстэй нэрээрээ нэг хэсэг хүмүүсийн толгойг эргүүлээд байсан “Mongolian airlines” компани Гонконг руу хямд үнээр шууд нислэг үйлдэж эхэлсэн тухайгаа сурталчилах болсон. Хэзээ байгуулагдсан тухайд маргаан дагуулаад байгаа “Mongolian airlines” цөөн онгоцтой ч гэсэн орон нутагт болон олон улсын нислэг хийж байгаа юм. 2011 оны 11-р сард Голланд улсад үйлдвэрлэгдсэн Fokker-50 маягийн 50 хүний суудалтай хоёр агаарын хөлгөөр үйлчилгээгээ эхлүүлж байсан энэ компани саяхан хоёр “Airbus А319” хөлөг түрээслэн авсан. “Mongolian airlines” 124 хүний суудалтай “Airbus А319” онгоцоор Гонконг руу тун хямд үнээр буюу хоёр талдаа 319 доллараар нислэг хийх болсон нь зорчигчидыг татаж эхлээд байсан юм.

   Гэсэн ч нэлээн хэд хоногийн өмнө ганган “Airbus А319”-ын нэг нь нисэх боломжгүй болжээ. Учир нь онгоцонд техникийн саатал гарсан гэж эх сурвалж хэллээ. Онгоц ослын буулт хийж сүр дуулиан болоогүй ч техник, дотоод нарийн хөдөлгүүрүүдэд нь тоос, шороо орсноос хөөрөх боломжгүй болсон байна. Энэ тухай албаны хүмүүс ам нээх дургүй байгаа аж. Ганц "дайчин" “Airbus А319”-аар Гонконг руу нислэг хийж байгаа боловч тоос шорооноос болж зогсчихдог онгоцоор хэрхэн үйлчлүүлэх вэ гэдэг эргэлзээ зорчигчидод бий болжээ. Гадаадын хэвлэлүүдээр онгоцны ослын тухай мэдээ салахгүй болсон энэ үед аюулгүй байдлаа бодсон иргэд Гонконг руу хямдхан нисэх эргэлзээтэй саналыг хүлээж авах эсэх дээр хянуур хандах болсон байна.

   Хэдийгээр “Mongolian airlines" гадаад руу нисэх ганц онготой болсон ч  “6-р сар дуустал хоёр талдаа 350 мянган доллар” гэсэн реклам зогсолтүй явж, гар утсанд мессежээр ирсээр байна.

“Airbus А319” онгоцны танилцуулга:
•    Суудлын тоо 8 бизнес, 116 энгийн нийт 124
•    Нислэгийн алслалт 6’850 км
•    Нислэгийн хурд 850 км/ц
•    Хөөрөлтийн дээд жин 70 тонн
•    Түлшний багтаамж 24 тонн