Залуу эрдэмтдийн зуны сургалт эхэллээ
Гадаадын  монгол  судлаач  залуу эрдэмтдийн зуны сургууль энэ жил 10 дахь удаагаа болж байна. Өнөөдөр нээлтээ хийсэн тус сургууль нь  ирэх сарын 14 хүртэл зохион байгуулагдана.  Тус зуны сургуулийг БСШУЯ-ны шийдвэрээр Монгол судлалын үндэсний холбоо, МУБИС хамтран зохион байгуулдаг билээ.
Энэ зуны сургуульд АНУ, ОХУ, Польш, БНХАУ, Япон, Солонгос, Турк зэрэг  7 орны 24 залуу судлаачид оролцож, ШУА, МУИС, МУБИС, ХААИС-ийн нэр хүндтэй  эрдэмтэн, багш нараар монгол орны түүх, соёл, шашин, аман зохиол, археологи, нүүдлийн мал аж ахуйн чиглэлээр хичээл заалгах юм. Энэхүү Гадаадын залуу монгол судлаачдын зуны сургуулийг зохион байгуулснаар сургалтад хамрагдсан залуу судлаачид нь монголын нүүдэлчдийн хэв шинжит амьдралтай танилцахаас гадна  ирээдүйн судалгааныхаа чиглэлийг тодотгох,  монгол улсын шинжлэх ухааны байгууллага,  эрдэмтэдтэй цаашид хамтран ажиллах өргөн бололцоог олгодог билээ. Мөн хилийн чанад дахь монгол судлалыг өргөжүүлэн, түгээн дэлгэрүүлэх  ихээхэн ач   холбогдолтой юм.
Д.Ундрах 24tsag.mn