Сайн байна уу Найз минь. Сонгуулийн кампанит ажил чинь амжилттай сайн байгаа биз дээ. Чиний сонгуулийн ажилд амжилт хүсэхийн ялдамд найз нөхдөөс чинь энэхүү захиаг бичихээр шийдлээ. Нэр дэвшснээсээ хойш бид бүхэнтэй уулзхаа больсон учир алга дарам цаасаар сэтгэлийн үгээ тээж, алс цацагдах телевизээр анд чамдаа хүргүүллээ.

  Хамтран зүтгэж, МАНАН-гийн эсрэг тэмцэж явсан чамайг Үйлдвэрчний эвлэлийн дарга болоход чинь бид дэмжин, эрх баригчдад мартсаныг нь сануулж, хийгээгүй ажлыг нь хийлгэх ард түмний албан ёсны төлөөлөл боллоо хэмээн баярлаж, хамтдаа наргиж, амжилтаа тэмдэглэж явсан билээ бид.

  Улс төрчдийн рейтинг тогтоох судалгаагаар эрх баригч намын дарга нар, тэр байтугай Монгол Улсын Ерөнхийлөгчөөс Элбэгдоржоос ч ч илүү саналаар, ард түмний 30 гаруй хувийн дэмжлэг хүлээж байна гэсэн мэдээг сонсоод бид бүхний тэмцлийн үр дүн, найзын минь хөдөлмөрийн үр шим хэмээн бахархаж, гудамжны тэмцэгчид төрийн эрх барилцах цаг холгүй ирлээ хэмээн битүүхэндээ догдлон хүлээж, итгэл найдвараа тээж байлаа.

  Чамайг УИХ-д дэвшихгүй гэхэд харамсан, нэг жилийн ч өмнө болсон төр түшилцэж ард түмний дуу хоолой болооч гэж ятгаж байснаа санаж байна. Дараа нь УИХ-д Хан Уул дүүргээс нэр дэвшихээр боллоо гэхэд чинь гайхаж байсан ч хөрөнгөтэй мөнгөтэй хүмүүсийг айлгах арга, сонгуулийн бэлтгэл хангах, санхүүгээ босгох тактик байсныг бас төдөлгүй ойлгосоон.

  Улс төрийн тогоонд бас ч үгүй олон жил чанагдаж байгаа чи парламентад ганц бие даагч гараад юуг ч өөрчилж чаддаггүйг мэднэ дээ. 25 дугаар ТВ-ийн Алтайг хар л даа. Юу ч хийж чадаагүй, түүнийгээ ч ойлгоод одоо ИЗНН-д элсэж олуулаа төрийн эрх барих шийдвэрээ гаргаж байна. Миний найз хэрвээ үнэхээр өөрчлөлт хийхийг бодож байсан юм бол ядаж Үйлдвэрчний эвлэлийн нам байгуулчихгүй дээ. Тэгсэн бол зөв бодолтой хэд хэдэн хүнийг өөртэйгээ хамт гаргаад л ирэх байсан.

  Аль нэг намд, өөрсдийнхөө байгуулалцаж байсан ИХ намдаа, эсхүл нэр цэвэр ИЗНН нам хамтдаа элсэж сонгуульд оролцох талаар ярилцаж байснаа санаж байна уу. ҮЭ-ийн Ганбаатар гэгдэж ард түмний 30 хувийн дэмжлэг хүлээж байгаа чи байтугай өстөн дайснууддаа боорлуулж буй Н.Энхбаяр хүртэл эрх баригчидтай тэмцэх эвсэл байгуулж, зорилгодоо хүрхийн тулд олуулаа амжилтад хүрэхээр чармайж байна цаана чинь.

  Чи угаасаа л багаар тоглодоггүй, телевизээр гарах бол юу ч хамаагүй ярьдаг, амиа бодсон нөхөр байсан тэр л хэвээрээ гэж хүмүүс муу хэлэх л юм. Үнэхээр үйлдэврчний Ганбаатартай хамтран ажиллах монгол хүн, олигтой нам олдохгүй байна уу. Эсвэл чиний яриад байдаг фэнг шүйгээр монгол хүнтэй хамтарч улс төр хийхээр сүлд чинь доройтож, ашиг орлого чинь буурах гээд байсан юм уу.

  Чи энэ чигээрээ амиа бодсон шоу хойшид битгий хийгээрэй, УИХ-д орсон ч амиа бодсон бэртэгчин шиг битгий дуусаарай. Дарханаас сонгогдсон бие даагч гишүүн, намуудыг ялсан баатар болоод сайн сайхан яваарай. МАНАН-г шантаажилсан шигээ, авах мөнгөө андуудаасаа нуусан шигээ, төрөөс төрсөн биш намуудаас төрсөн тэрбумтан болсон ч тэмцлээсээ битгий ухарчихаарай. Ард түмнийхээ итгэл найдварыг тээж яваарай, ардын намдаа битгий элсээрэй гэж захья.