Өнөөдөр 17.00 цагаас МАХН-ын төв байр цагаан ордонд хуульчдын эвслээс хэвлэлийн бага хурал хийлээ. Тэд сонгуулийн хууль зөрчсөн үйлдлүүдийг уг хэвлэлийн хурлынхаа үеэр өгсөн юм. “Сонгуулийн хугацаа дуусч, санал өгөх өдөр ойртох тусам намуудын өрсөлдөгчдөө хорлох гэсэн явуургүй ажиллагаа улам эрчимжээд байна. Шударга байхыг ухуулан сурталчлаад байгаа МАН-ынхан гэхэд өөрсдөө хууль бус ажиллагаа хийсээр байна. Өнөөдөр гэхэд тус намаас Баянзүрх дүүргийн 22 тойрогт нэр дэвшиж байгаа Д.Арвин “Хэрлэн” нэртэй зоогийн газарт дүүргийнхээ олон багш нарыг автобусаар авч ирж өдрийн хоолоор дайллаа. Үүнийг нь мэдсэн МАХН-МҮАН-ын “Шударга ёс” эвслийн хоёр залуу баримтжуулж авахаар бичлэг хийж байтал УНГ 66 67 улсын дугаартай Соната маркийн машинтай дөрвөн залуу ирж гарыг мушгин зодож камерийг нь аваад зугтсан байна.
Сонгууль дуусч санал өгөх хугацаа ойртох тусам энэ мэтчилэн арга ядсан аргаар хүмүүсийг төөрөгдүүлэх гэж оролдож байна. Тиймээс бусад нэр дэвшигчиддээ шударгаар өрсөлдөцгөөе гэж уриалмаар байна.
Мөн МАХН-МҮАН-ын “Шударга ёс” эвслээс нэр дэвшигчдийн сурталчилгааны самбарыг хулгайлах, урж тасдах, дүүрэг, хороодын намын байр руу халдах хэрэг удаа дараа гарч байгаа. Үүний нэг жишээ гэхэд уг эвслээс Хан-Уул дүүрэгт нэр дэвшиж байгаа Л.Жамбалжав эмчийн сурталчилгааны самбарыг урж тасдсан байна. Мөн бусад дүүргүүдээр байрлуулсан тус эвслийн сурталчилгааны самбарууд хулгайд алдагдаж байна. Тиймээс МАХН-МҮАН-ын “Шударга ёс” эвслийнхэн үүнд маш их санаа зовж байна. Учир нь хулгайд алдагдсан самбаруудыг сонгуулийн сурталчилгаа дуусах үеэр нэр төрд халдаж гүтгэхээр төлөвлөн хулгайлсан байж магадгүй юм. Тиймээс ЦЕГ, Тагнуулын ерөнхий газарт хандаад байгаа” гэв.
Б.Золбоо
