"Монгол HD" телевиз Ерөнхий сайд асан УИХ-ын гишүүн С.Батболд, Барилга, хот байгуулалтын сайд асан Д.Цогтбаатар нарыг оффшор бүсэд данстай гэж мэдээлсэн билээ. Гэхдээ урьд шөнө "Panama Papers"-ээс албан ёсоор зарласан материалд тэдний нэр байхгүй байгаа юм.
Энэ талаар тэд хэвлэлийн бага хурал хийж албан ёсны мэдээлэл өглөө.
СҮ.БАТБОЛД: БИ ХУВЬЦАА ХУДАЛДАЖ АВЧ, ЗАРСАН. ТҮҮНЭЭС ОФФШОРТ ДАНС НЭЭГЭЭГҮЙ
УИХ-ын гишүүн Сү.Батболд энэ талаар ярихдаа " Манай хуулиар бол улс төрчид бизнесийн үйл ажиллагаанд шууд оролцох боломжгүй ч хувьцаа худалдан авч хөрөнгө оруулах боломжтой. Бидний оролцсон энэ ажил хуулийн хүрээнд хийгдсэн бизнес гэж ойлгож байгаа. Оффшор компанитай холбоотой учраас бидний зүгээс тайлбар хийх хэрэгтэй. Бату Майнинг нь Монгол Улсад бүртгэлтэй гадаадын компани. Толгой компани нь эндхийн бүртгэлтэй компани байна. Энэ компанид бид орохдоо нууцаар ороогүй. Энд нуух хаах асуудал байхгүй учраас нэрээрээ орсон. Бату Майнингийн 11.9 хувийг 2003 онд худалдаж авсан. Энэ хувийг би 18,771 доллартай тэмцэх хувийг авсан. Энэ мөнгө нь С.Батболд гэдэг хүний хувийн данснаас буюу тухайн үед Капитрон банкны данснаас авсан. Энэ бол ил тод, хуулийн дагуу ойлгомжтой худалдаж авсан хувьцаа. 2005 онд энэ компанийн үйл ажиллагаа ил тод бус болж ирсэн тул хувьцаагаа өртгөөр нь зараад гарсан. Би хувьцаа худалдаж авсан, зарсан. Түүнээс биш оффшор компани байгуулаад данс эзэмшээд байгаа юм байхгүй. Та бүхэнд тайлбар өгөхөөс гадна энэ асуудлаар хуулийн байгууллагад хандана. Бид хууль зөрчсөн эсэхийг шалгуулна. 2003 онд дээрх компанийн хувьцааг 50 мянган ам.доллараар худалдаж аваад 2005 онд эргүүлж зарсан. Яагаад хөрөнгө орлогын мэдүүлэгтээ тусгаагүй талаар асууж магадгүй юм. Учир нь улс төрчид хөрөнгө, орлогоо 2007 оноос мэдүүлдэг болсон. Тиймээс би 2005 онд зарсан хувьцаагаа мэдүүлэх шаардлага байгаагүй. Би 1992 оноос компани байгуулж ажилласан. Энэ компанийн үйл ажиллагаа бүгдэд нээлттэй байсан" гэв.
Д.Цогтбаатар: НАДАД ОФФШОР ДАНС БАЙХГҮЙ ГЭДГИЙГ ХАРИУЦЛАГАТАЙГААР ХЭЛЬЕ.
Харин БХБ-ын сайд асан Д.Цогтбаатар "Надад оффшор данс байхгүй гэдгийг хариуцлагатайгаар хэлж байна. Тухайн үед Австралийн хөрөнгө оруулалттай компанид манай найзууд хамт хөрөнгө оруулах уу гэж байсан. Би Австралид сургууль төгссөн юм. Монгол Улсад ГХО-тай компанийн арваас доошгүй хувь нь оффшор байдаг. Бид тэр компанид ямар ч оролцоо байхгүй. Монголын Оюу толгой компанийн толгой компани нь оффшорт бүртгэлтэй байдаг. Миний зүгээс 11 сая төгрөгийн хөрөнгө оруулалт хийгээд 2005 онд гараад явсан. Харин хөрөнгө орлогын мэдүүлэгт 2007 оноос мэдүүлдэг болсон учраас бид мэдүүлээгүй. Надад байгаа хувьцааг би нэгд нэгэнгүй ХОМ-д оруулж өгдөг. Жишээ нь би Петро мат компанид хувьцаа эзэмшдэг. Петро мат компани Лондонгийн хөрөнгийн биржид бүртгэлтэй. Лондонгийн хөрөнгийн биржийн толгой нь оффшорт байдаг. Энэ нь бүгд баримттай. Би аль нэгэн компанид хувьцаа эзэмшдэг болохоос оффшорт компани байгуулаад мөнгөө нуусан зүйлгүй" гэв.
Үүний дараа сэтгүүлчдийн сонирхсон асуултад хариулт өглөө.
-Сүхбаатарын Бат-Очир гэх хүн оффшорт данстай хүмүүсийн дунд байна лээ. Танай дүү мөн үү?
Сү.Батболд: Манай ах. Би өглөө утасдаж асуухад "Би шалгая" гэсэн. Манай ах 25 жил бизнес хийж байгаа хүн. Бизнесийн хүн бизнесээ хийгээд явж байгаа бол хууль ёсны асуудал. Гэхдээ улс төрчийн ах гэдгээр ярьж, хэлж магадгүй. Тиймээс шалгуулах ёстой.
- Манай улсын хуулиар улс төрчид аль нэгэн оффшор бүсэд данстай байхыг хориглоогүй байгаа. Ер нь хориглох шаардлагатай. Үүнд зориулсан хуулийг батлах ёстой гэж байгаа. Энэ талаар та хоёр ямар бодолтой явдаг вэ?
Сү. Батболд:- Хууль ёсны дагуу бизнесээ хийгээд эсвэл аль нэгэн компанид хувьцаа эзэмшдэг байгаад үүнийгээ хөрөнгө орлогын мэдүүлэгтээ зөв мэдүүлээд явбал байэ болно. Үүнийг хүчээр зогсоох нь бидний барьж байгаа зарчимд хэр нийцэж байна гэдгийг бодох хэрэгтэй.
Д.Цогтбаатар: - Оффшорт хулгайлсан мөнгөө нуух, мөнгө угаах нь шууд хориотой. Хүмүүс өөрийнхөө мөнгөөр хувьцаа худалдаж аваад шударгаар олсон мөнгө нь байгаа бол асуудлалгүй. Чи улс төрч учраас энэ хувьцааг авч болохгүй гэж болохгүй биз дээ. Хамгийн гол нь түүнийгээ ХОМ-доо бүрэн мэдүүлэх ёстой.
Т.Хулан
.
Сэтгэгдэл (13)