-ХУВЬЦААГ МӨНГӨЖҮҮЛЖ БУЙ АСУУДЛЫГ СОНГУУЛЬТАЙ ХОЛБОХ ХЭРЭГГҮЙ-

Өнгөрсөн долоо хоногт Засгийн газрын ээлжит бус хуралдаанаар "Эрдэнэс Тавантолгой" ХК-ийн 1072 ширхэг хувьцааны 30 хувь буюу 322 ширхэг хувьцааг 300 мянган төгрөгөөр төр иргэдээсээ худалдаж авах шийдвэрийг гаргасан билээ.

2012 оны дөрөвдүгээр сарын байдлаар 2.858.000 иргэн хувьцаа эзэмшиж байснаас нийтдээ 278 мянган оюутанд 138 тэрбум төгрөг, Эрүүл мэндийн даатгалын шимтгэл хэлбэрээр 615 мянган иргэнд 4.8 тэрбум төгрөгийг хэсэгчлэн, ахмад болон хөгжлийн бэрхшээлтэй 322 мянган иргэнд 322 тэрбум төгрөг, нийтдээ давхардсан тоогоор 1 сая 216 мянган иргэнд 464.8 тэрбум төгрөгийг бүхэлд нь болон хэсэгчлэн мөнгөжүүлэх ажлыг хийсэн байна.

Өнөөдрийн байдлаар 18 хүртэлх насны хүүхдүүдийг оролцуулалгүйгээр тооцвол, 1 сая 650 мянган иргэний хувьцаа мөнгөжөөгүй байна. Тиймээс уг хувьцааг мөнгөжүүлэх санхүүжилтийн эх үүсвэрийг Засгийн газраас шийдвэрлэжээ.

Ерөнхий сайд Ч.Сайханбилэг хэлэхдээ “Хувьцааг мөнгөжүүлж буй асуудлыг сонгуультай холбох хэрэггүй, бэлэн мөнгө тарааж буй асуудал биш. Хувьцааг нь худалдаж авч байгаа, өөрөөр хэлбэл төлбөр хийж байгаа асуудал юм. Түүнчлэн бүх асуудал хуулийн хүрээнд болно. Эдийн засгийн хүндрэлтэй энэ үед Засгийн газар 1072 ширхэг хувьцааг мөнгөжүүлсэн, эдийн засагт тодорхой хэмжээний эерэг өөрчлөлт авчрах шийдвэр гаргалаа” гэсэн юм.

Иргэдийн хувьд заавал 322 ширхэг хувьцаагаа арилжих шаардлагагүй бөгөөд үлдсэн 750 ширхэг хувьцааг оны хоёрдугаар Засгийн газрын зүгээс  дараачийн ээлжинд хэрхэн эдийн засгийн эргэлтэд оруулах талаар хэлэлцэхээр болсон аж. Хувьцаагаа мөнгөжүүлэх хүсэлтэй иргэд улс орон даяар үйл ажиллагаа явуулж байгаа арилжааны банкуудын бүх салбарт очиж маягт бөглөсний үндсэн дээр өргөдлөө гаргаж, хүсэлтээ илэрхийлэх бөгөөд өнөөдрөөс энэ ажил эхэлж байна.

Өргөдөл өгснөөс хойш долоо хоногийн дараа мөнгөө өөрийн дансаар авах бөгөөд тодорхой хугацаанд захирагдахгүй үргэлжлэх юм.Энэ талаар сурвалжлахаар Арилжааны банкуудыг зорьж, иргэдийн байр суурийг сонирхлоо.

Хаан банкны бүх салбарууд өнөөдөр ачаалал ихтэй ажиллаж байна. Иргэд өглөөнөөс эхлэн очерлож, хувьцаагаа худалдахаар бүртгүүлж байна гэв.Тус банкны хувьд иргэний үнэмлэх эх хувиараа болон гурван хувь канондаж, бүртгэлийн маягтыг гурван хувь бөглөх шаардлагыг тавьжээ. Иргэдийн хувьд зарим нь энэ талаар мэдээлэлгүй байсан бөгөөд, ямар материал бүрдүүлэх эсэхийг банкны ажилтнуудаас тодруулж байсан юм. Мөн иргэдийн хувьд өмнө нь бэлэн мөнгөөр авах хүсэлт гаргаж байсан хийгээд брокер дилерийн компанинд хандан данс нээлгэж байснаас үл хамааран хувьцаагаа худалдана гэдгийг холбогдох албаныхан тодотгож байгаа юм.Харин Голомт болон Төрийн банкны зарим салбарууд харьцангуй ачаалал багатай ажиллаж байна. Голомт банкны хувьд бүртгэл маягт бөглөөд иргэний үнэмлэхтэйгээ очоод банкны ажилтанд бүртгүүлэх бол Төрийн банк иргэний үнэмлэхтэйгээ байх шаардлагыг тавьжээ. Хөгжлийн бэрхшээлтэй иргэд, өндөр настан, оюутнууд өмнө нь хувьцааны мөнгөө авсан бөгөөд тэдэнд хувьцаа худалдах эрх нээгдэхгүй юм. Зарим иргэд хувьцаагаа зараад юу хийх, юу авахаа хүртэл төлөвлөсөн гэж байлаа. Харин зарим нь хувьцаагаа худалдах нь буруу гэдэг байр суурийг ч илэрхийлж байсан юм.

Иргэдийн төлөөлөл хувьцаагаа худалдах талаар ийн ярилаа.

-ИРГЭДЭД МӨНГӨ ХЭРЭГТЭЙ БАЙГАА ҮЕД ЗӨВ ШИЙДВЭР ГЭЖ БОДОЖ БАЙНА-

Дорнод аймгийн иргэн Х.Цэвэгмид: -Иргэдийн амьдрал ахуй тааруухан байна. Мөнгөний хэрэгцээ их байна. Хэдэн малаар амьдралаа залгуулна гэдэг боломжгүй болсон. Хувьцаагаа худалдах ажлыгих зөв гэж бодож байна. Гэхдээ би хувьцааныхаа мөнгийг өмнө нь авчихсан байсан. Энд хүүхэдтэйгээ ирсэн. Мөнгө хэрэгтэй үед их хэрэг болж байна.

Сүхбаатар дүүргийн 10 дугаар хорооны иргэн Б.Баасанхүү: -ТАВАНТОЛГОЙН АШГИЙГ БИД ХҮРТЭХ ЁСТОЙ-

-Төр засаг өгч байгаа дээр нь авсан дээр гэж бодож байна.Тавантолгойн энэ хувьцаа үнэгүйдвэл яах билээ. Ямар бүгдийг нь худалдчихаж байгаа биш. Үлдсэн хувьцаа нь байгаа юм чинь, иргэдийн амьдрал хэцүү байгаа энэ үед зөв ажил гэж бодож байна. Тэгээд ч Тавантолгойг гадныханд өгөх гэж байхад нь энэ засгийн эрх баригчид авч үлдсэн гэсэн. Бид Тавантолгойн ашгийг хүртэх ёстой. Энэ эрх баригчдыг иргэдээ бодсон, зөв шийдвэр гаргаж байгаасай л гэж хүсч байна.

-ХУВЬЦААГАА ЗАРАХ ЭСЭХЭЭ САЙН МЭДЭХГҮЙ БАЙНА-

 -Чингэлтэй дүүргийн 10 дугаар хорооны иргэн н.Лэгзмаа: -Яг үнэндээ зарах нь зөв, буруу гэдгээ мэдэхгүй байна. Яах вэ гээд л хүмүүсийг хараад л зогсч байна. Хүмүүс зарах нь зөв л гэх юм, буруу л гэх юм. Уг нь мөнгө хэрэгтэй үед зөв шийдвэр юм. Гэхдээ хувьцаагаа хадгалж байвал бүр илүү ашигтай байх ч юм болов уу гэж бодож байна. Зарим нь сонгуулийн шоу ч гэх юм гэсэн байр суурийг илэрхийлсэн юм.

-МӨНГӨНИЙ ХЭРЭГЦЭЭ ИХ БАЙГАА УЧРААС БИ 30 ХУВИА ЗАРААД, ЭХНЭР ХУВЬЦААГАА ХАДГАЛНА ГЭСЭН-

Сүхбаатар дүүргийн иргэн Д.Батдорж: -Хөгжлийн бэрхшээлтэй иргэд, өндөр настан, оюутнууд өмнө нь хувьцаагаа мөнгөжүүлж авсан шүү дээ. Эх орны хишиг, Эрдэнийн хувь гээд энэ их сайн ажил байсан. Олон оюутан сургалтын төлбөрөө төлүүлсэн. Ар гэрт нь төлбөр төлөх ачаалал ч буурсан. Тухайн үед манайх хоёр оюутантай байсан. Их зөв ажил гэж бодож байлаа. Төр засгаас бидэнд хувь хишиг гээд өгсөн зүйлээ буцаагаад худалдаж авна гэдэг зөв шийдвэр л гэж бодож байна. Айл бүхэнд л мөнгөний хэрэгцээ их байдаг. Тиймээс 1072 хувьцаатай гэр бүлийн гишүүд нэг нь зараад, нэг нь хадгалж болно шүү дээ. Миний хувьд  30 хувиа зараад, эхнэр маань  хувьцаагаа хадгална гэсэн. Дараа илүү үнэд хүрэх ч юм бил үү. Иргэд дурын арилжааны банкинд хандан, тодорхой маягт бөглөх замаар хүсэлтээ гаргаснаар долоо хоногийн дотор холбогдох газруудад бүртгэлийг тулгах ажил хийгдэх юм.

Хувьцааны мөнгө иргэдийн дансанд гурав хуваагдан байрших бөгөөд худалдах эрхтэй 1.657.000 иргэн байгаа аж. Харин хүүхдүүдийн хувьцааг энэ удаа төрөөс худалдан авахгүй. Учир нь, тухайн хүүхэд иргэний үнэмлэх авсан хойноо хувьцаагаа өөрөө захиран зарцуулах эрхээ эдлэх хэрэгтэй гэж үзсэн  байна.