Сонгуулийн ерөнхий хорооноос УИХ-ын 17 тойрогт ялсан нэр дэвшигчдийн нэрсийг зарласан. Үүний дараа МАН, "Шударга ёс" эвсэл, ИЗНН болон бусад жижиг намууд хамтарч хэвлэлийн бага хурал хийлээ. Тэд энэ удаагийн сонгуулийн санал тоолох үйл явцыг будлиантай болсон гэж үзэж байгаа юм.   
    Тиймээс СЕХ-нд орон даяар саналын хуудсыг дахин гараар тоолох ёстой гэсэн шаардах бичиг хүргүүлэхээр болжээ. Энэ хуралд МАН-ын нарийн бичгийн дарга Я.Содбаатар, МАХН-ын дэд дарга Ч.Улаан, БНН-ын дарга Б.Жаргалсайхан зэрэг хүмүүс ирж, энэ шаардлага тайлбарлав. Тухайлбал БНН-ын дарга Б.Жаргалсайхан "Саналын хуудсыг тоолуулахгүй гээд дараад хэвтчих тохиолдол маш их гарсан. Энэ сонгуулийн тоо маш будлиантай боллоо. Санал тоолох машиныг ч тэр, програм хангамжийг нь ч тэр "Бодь" групп хариуцаж байсан" гэв. Харин МАХН-ын дарга Ч.Улаан "Ард иргэд сонгогчдын санал нэлээн гажуудсан бодитой жишээ цаг өнгөрөх тусам илэрсээр байна.Тухайлбал, Чингэлтэй, Сүхбаатр зэрэг сонгуулийн ихээхэн эргэлзээтэй байгаа" гэсэн юм. Хэрэв дахин тоолохгүй гэвэл дахин сонгууль явуулах ёстой гэж хэлэх хүмүүс жижиг намуудын дунд олон байлаа.

   Уг шаардах бичигт, "УИХ болон НИТХ-ын саналыг автомат машинаар тоолох үйл явц будлиантай болсон нь олон хэсгийн хороонд ажиглагдсан. Тиймд уламжлалт гар ажиллагаагаар шалгаж, тооллогын дүнг баталгаажуулахыг шаардаж байна" гэжээ.