Энэ сарын 28-ны өдрийг УИХ-ын сонгууль болох гэж буйтай холбогдуулан бүх нийтийн амралтын өдөр болгосон. Амралтын өдрөөрөө сонгуулиа өгсөн иргэд зугаалж яваад амь насаа алдсан харамсалтай хэрэг гарсан байна. Тодруулбал, Увс нуурт зугаалж байсан 43 настай Б, 28 настай У, 23 настай М, 14 настай Б нар нуурын усанд осолдож амиа алджээ. Уг Раажийн гэх нууранд хүн ордоггүй, зэгс намаг ихтэй нуур аж. Тэд нэгнийгээ осолдоход амийг нь аврахаар ар араасаа цувран орсноор ийнхүү амиа алдсан байна. Хэргийн газар Онцгой байдлын хэлтсийн аврагчид ажиллаж, 43 настай Б, 28 настай У нарыг уснаас гаргаж, аймгийн нэгдсэн эмнэлэгт хүргэхээр явсан ч замдаа нас баржээ. Харин 23 настай М, 14 настай Б нарын цогцсыг 100 метрийн гүнд живсэн байхад нь гаргасан байна. Онцгой байдал, нэгдсэн эмнэлгийн 14 хүн ажиллажээ.Б.Чимэг
