Энэ сонгууль холимог тогтолцоогоор явагдаж, сонгогчид 26 тойрогт нэр дэвшигчдээс сонголт хийлээ. Мөн пропорциональ тогтолцооны дагуу намын нэр дугуйлав. Харин өнгөрсөн бямба гаригт СЕХ-ноос сонгуулийн урьдчилсан дүнг албан ёсоор танилцуулсан. Нийт сонгогчдын 35,32 хувь нь АН, 31,31 хувь нь МАН, 22,31 хувь нь МАХН-МҮАН "Шударга ёс" эвсэл, 5, 51 нь ИЗНН-д саналаа өгсөн байна. Тэгэхээр намын жагсаалтаар нэр дэвшсэн АН-аас 12, МАН-аас 9, МАХН-МҮАН-Шударга ёс эвслээс 6 ИЗНН-аас 1 хүн УИХ-д орох эрхтэй болж байна.
Өөрөөр хэлбэл, АН-аас Н.Алтанхуяг, З.Энхболд, Х.Тэмүүжин, Ч.Сайханбилэг, Д.Эрдэнэбат, Ш.Түвдэндорж, Р.Бурмаа, Ц.Баярсайхан, Р.Гончигдорж, М.Батчимэг, Б.Мэдрээ, Л.Гансүх, МАН-аас С.Батболд, У.Хүрэлсүх, Д.Дэмбэрэл, Ө.Энхтүвшин, Д.Лүндээжанцан, Ц.Нямдорж, Н.Энхболд, Я.Содбаатар, Ж.Энхбаяр, МАХН-МҮАН-ын шударга ёс эвсэл Ч.Улаан, Н.Батцэрэг, М.Сономпил, Ц.Баянсэлэнгэ, О.Баасанхүү, Ц.Цолмон, Иргэний зориг ногоон намаас зөвхөн С.Оюун гишүүн парламентад орох аж. Жагсаалтаас харахад ихэнх нь дахин сонгогдсон гишүүд байгаа юм.
Харин МАХН-МҮАН-Шударга ёс эвслийнхний хувьд жагсаалтад орж буй таван эрхэм анх удаа сонгогдож байгаа. Тухайлбал, тус намын жагсаалтын дөрөвт байгаа эрхэм З.Баянсэлэнгэ. Түүнийг улс төрийн тоглоомонд сэргэлэнтэж, хожлоо гэх хүн олон байгаа юм. Учир нь тэрээр МАХН-ын дарга Н.Энхбаярыг хоригдсоны дараа жагсаал, цуглаан зохион байгуулж, өлсгөлөн зарлаж 14 хоног ганц худагт хоригдож байсан нэгэн. Үүний хариуд намын жагсаалтад дээгүүр жагссан хэмээн иргэд үзэж байгаа билээ.
24tsag.mn
