Энэ удаагийн сонгууль харьцангуй намдуу тайван болж өнгөрлөө. Гүтгэлэг доромжлол урьдынх шиг гаарсангүй. Энэ нь сонгуулийн хуулинд нэр дэвшигчийнхээ нэр төрд халдах болон нэр дэвшигчийг гүтгэсэн хэвлэл мэдээллийн хэрэгслийг нэлээд өндөр хэмжээгээр торгохоор заасантай холбоотой байж болох юм. Мөн монголчууд сонгуулийн соёлд дасч байгаа гэж үзэх хүн ч байна. Юутай ч гэсэн 2012 оны сонгуулийг олон нийт сайнаар дурсаж байна.Гэвч өрсөлдөгчийнхөө нэр төрд халдсан гүтгэлэгийн мэдээллийг зарим тойрогт нэр дэвшигчид хийгээд амжсан. Тэдний тэргүүн эгнээнд Гарьдхүүгийн Баярсайхан бичигдлээ. Сонгуулийн сүүлийн хэд хоногт түүний өрсөлдөгч ЭБЭХ-ний сайд Д.Зоригт цөмийн хаягдлыг Монголд булшлахаар гэрээ хийсэн мэтээр гүжир гүтгэлэг гаарсан. Энэ гүтгэлэгийн гол тоглогч нь Цөмийн энергийн газрын дарга асан С.Энхбат гэгч байсан юм. Тэрбээр сонгуулийн сүүлийн өдрүүдэд “Д.Зоригт сайдыг сонгож болохгүй, тэр цөмийн хаягдлыг булшлах гэрээ хийсэн” гэж АН-ын “Олуулаа” мэдээгээр хэд хэдэн удаа мэдэгдээд авсан. Бас сонин, телевиз, сайтуудаар ч олон юм ярьсан. Бүр цөмийн хаягдлын талаар сөрөг нэвтрүүлэг хийж, Д.Зоригт сайдын үсийг хусах ёслолыг ч хийгээд амжсан юм.
Харин энэ бүхнийг гол зохион байгуулагч бас санхүүжүүлэгч нь Г.Баярсайхан гэж эх сурвалж мэдээллээ. Сонгуулийн маргааш өдөр Цөмийн энергийн газрын дарга асан С.Энхбат гэгч найз нөхөддөө “АН-ын захиалгаар бохир муухай юм хийлээ. Д.Зоригт сайд намайг эрүүгийн цагдаад өглөө. АН ялсан юм чинь гайгүй болов уу, яах бол” гэсэн утгатай юм ярьж явсан сурагтай.
Ийнхүү С.Энхбат улс төрийн том тоглолтод орж хүн гүтгэх ажилд гаршив. Түүнийг цагдаад өгсөн. Тэрбээр уг нь эргээд Цөмийн энергийн газрын дарга болох туйлын сонирхолтой. Энэ сонирхол дээр нь АН сайхан тоглолт хийлээ. АН-ынхан болоод Г.Баярсайхан амласандаа хүрч С.Энхбатыг Цөмийн энергийн газрын даргаар буцаан томилох болов уу? Харин С.Энхбатыг “тоглосон юм аа” гээд шүүхийнх нь үүдэнд хаях болов уу гэдгийг олон хүн харж байна.
Энэ сонгуулиар өрсөлдөгчөө хамгийн их гүтгэсэн хүнээр Г.Баярсайхан тодроод байна. Цаашид ч гэсэн түүнтэй өрсөлдөх хүмүүс түүний увайгүй үйлдлээс болгоомжилж байхгүй бол “хар юм” хийж гаршсан гэдгээ харуулав.
Хэрэв Г.Баярсайхан ЭБЭХ-ний сайд Д.Зоригтыг цөмийн хаягдлыг булшлах гэж байсныг нотолж чадвал баатар болно. Харин чадахгүй бол гүтгэгч гэдэг шинэ цол зүүнэ. Д.Зоригт сайд ч гэсэн цөмийн хаягдал булшлах гэж байсан бол буруутан болно. Гүтгүүлж байсан бол 2016 онд дахин сонгогдоод баатар болоод гараад ирнэ.
Ийнхүү өнгөрч буй сонгуулийн гол сонины нэг нь цөмийн хаягдал болов. Түүнийг гаргаж ирж, бусдын ятгалагаар асуудлыг дэгдээсэн хүн нь Цөмийн энергийн газрын дарга асан С.Энхбат байлаа. С.Энхбат хүн гүтгэсэн хэргээр цагдаад очсон. Үйл явдлын өрнөлийг цааш нь харах л үлдлээ.
24tsag.mn
