МАХН энэ удаагийн сонгуульд МҮАН-тай нэгдэн “Шударга ёс” эвслийг байгуулан оролцсон. Хэдийгээр уг эвслээс УИХ-ын сонгуульд оролцож буй эрхмүүдийн ихэнхийг хүмүүс танихгүй ч тэд Н.Энхбаярын нэрээр УИХ-ын гишүүд болсон гэхэд хилсдэхгүй.
   МАХН энэ удаагийн сонгуульд МҮАН-тай нэгдэн “Шударга ёс” эвслийг байгуулан оролцсон. Хэдийгээр уг эвслээс УИХ-ын сонгуульд оролцож буй эрхмүүдийн ихэнхийг хүмүүс танихгүй ч тэд Н.Энхбаярын нэрээр УИХ-ын гишүүд болсон гэхэд хилсдэхгүй. Н.Энхбаяр өөрийн хүч чадал, ур чадвараа дайчлан ажилласнаар тус эвслээс тойрогт дөрвөн суудал, жагсаалтаар долоон хүн буюу УИХ-д нийтдээ 11 суудал аваад байгаа юм. Ингэснээр гуравдагч хүчин буюу сөрөг хүчин гэдгээ харуулав. Үүнд намын даргын хувьд Н.Энхбаяр ихээхэн баяртай байгаа аж. Аргагүй биз дээ. Тэрээр мундаг улс төрч болохоо харуулж, нам нь сөрөг хүчин болж, түүний зорилго биелсэн хойно.
    Мөн эвслээс байгуулсан амжилт нь түүний шүүхэд ирээд байгаа авилгалын хэрэгт ч нөлөө үзүүлэхээр байгаа юм. Учир нь Н.Энхбаярыг энэ сарын 18-нд шүүнэ. Эрх баригчид түүнээс айсандаа яллахаар улайрч байгаа хэмээн иргэд дүгнэж байгаа. Гэвч “Шударга ёс” эвсэл УИХ-д 11 суудал авсан нь Н.Энхбаярыг яллах боломжгүй болгож байна гэхэд хилсдэхгүй. Н.Энхбаярыг цагдан хоригдож, өлсгөлөн зарласан үед үнэнч байсан хүмүүс намын жагсаалтад дээгүүр бичигдэж, УИХ-ын гишүүний болох боломжоо бүрдүүлээд байгаа. Тэгэхээр даргыг нь энэ сарын 18-нд яллавал УИХ-д сонгогдсон эрхмүүд нь ч зүгээр суухгүй байх. Тэгэхээр УИХ-д 11 суудал аваад байгаа сөрөг хүчний намын даргыг яллах нь боломжгүй болж байгаа юм. Энэ мэт түүнд таатай зүйлүүд тохиолдсонд тэрээр сэтгэл хангалуун, баяртай байгаа ч бас гуниг харууслаар дүүрэн байгаа гэнэ.
    Учир нь тэрээр 2012 оны УИХ-ын сонгуульд нэр дэвшихээр намын жагсаалтын нэгт бичигдээд байсан. Гэвч Сонгуулийн ерөнхий хорооноос түүнийг нэр дэвших эрхгүй болгосноор тэрээр намаа хөшигний цаанаас удирдахаар болсон юм. Мөн өөрөө нэр дэвших эрхээ хасуулаад зогсохгүй хүү Э.Батшугар нь мөн хасуулсанд сэтгэл их гонсгор байгаа аж. Уг нь түүний хүү намын жагсаалтын тавд бичигдэж байсан билээ. Хэрвээ хасаагүй байсан бол аав хүү хоёр хоёулаа УИХ-ын эрхэм гишүүд болох байв. Гэвч Сонгуулийн ерөнхий хороо тэдэнд энэ боломжийг олгосонгүй. Түүнчлэн түүний түшиг тулгуур болох академич С.Нарангэрэл, хуульч С.Авирмэд, З.Ойдов нарыг мөн сонгуульд оролцох эрхийг нь хассан нь түүнд хүнд туссан юм. Хэдийгээр Н.Энхбаяр өөрөө нэр дэвшиж чадаагүй ч тэрээр эвслээ хөшигний цаанаас маш сайн удирдаж байгаа нь УИХ-ын сонгуульд байгуулсан амжилтаас тодорхой харагдаж байгаа юм. Хэрвээ Н.Энхбаяр өөрөө УИХ-д орсон бол эрх баригчдыг сандаргаж мэдэх байлаа гэх хүмүүс олон байв.