Сонгуулийн ширүүн тулаан өрнөөд намжсан ч ялсан, ялагдсан хүмүүсийн улс төр дуусаагүй байна. Санал хураалтын өмнөх өдрүүдэд мөнгө тараасан, хууль зөрчсөн, намаас нь хөөсөн гэх зэрэг ширүүхэн үйл явдалууд өрнөж байв. Тухайлбал Өвөрхангай аймгийн УИХ-ын 10-р тойрогт АН-аас нэр дэвшсэн Г.Батхүү, М.Зоригт нарыг иргэдэд 168 сая орчим төгрөг тараасан гэж намынх нь нөхөр нь матаж орхисон. Өвөрхангай аймгийн АН-ын дарга Т.Хасбаатар тэднийг мөнгө тараасан гэдгийг баримтаар нотолж чадна хэмээгээд намаасаа хөөгдсөн билээ. Харин үүний цаана бас л их улс төр явж байжээ гэдгийг өнгөрсөн хойно нь АН-ынхан шивнэлдэж байна. “АПУ”-гийн Г.Батхүү, “Монгол шуудан”-гийн М.Зоригт нар мөнгөтэй, бэлтэй хүмүүс тул мөнгө тараасан гэхэд итгэх хүн олон. Дээр нь унасан бөхдөө хайртай байдаг монголчууд намаасаа хөөгдсөн Т.Хасбаатарыг өмөөрч Г.Батхүү, М.Зоригт нарын хувьд байдалд хүндээр эргэсэн. Сонгуулийн өмнөх хэдэн өдөр хэвлэл мэдээллийн хэрэгслээр зогсоо зайгүй явсан энэ мэдээ иргэдийн сонголтонд нөлөөж, Г.Батхүү, М.Зоригт нар тойргоосоо гарч чадсангүй. Өрсөлдөгч нь биш, харин тогоон дотроосоо нэр дэвшигчдээ хууль зөрчсөн гэж мэдэгдсэн нь бас нэгэн сонин үзэгдэл байв.
    Харин ойрын эх сурвалж АН Өвөрхангайн тойргоо алдсан нь АН-ын нэгэн лидертэй холбоотой гэж мэдээллээ.  Намынхаа жагсаалтанд хоёрт бичигдэж, дахин парламентад залрах нь тодорхой болсон З.Энхболд гишүүнийг Г.Батхүүтэй зөрчилтэй байдаг тухай намынхан нь ярьдаг. Дээр нь Өвөрхангай аймгийн АН-ын дарга асан Т.Хасбаатар бол З.Энхболд гишүүний хүн. З.Энхболд хуулиа мэднэ, яаж унагаахаа ч бас мэддэг аж. Тиймээс Г.Батхүүг унагахад мөнгө тараасан гэсэн мэдээлэл цацсан Т.хасбаатар гэгч  З.Энхболдын команаар хөдөлсөн тухай зарим эх сурвалж хэлж байна. Тэд нэг намын гишүүд, олон жил нэг “ангид” хамт суусан ч хоорондоо байнга зөрчилтэй байжээ. Г.Батхүү бол “Алтан гадас” фракцын луухгаруудын нэг. Харин З.Энхболд гишүүн энэ жил “Шонхор” нэртэй цомхон хэрнээ хүчтэй дуугардаг фракцыг нам дотроо байгуулсан билээ. Тэдний нам дотроо таардаггүй зөрчил нь намынхаа суудлыг нэгээр хорогдуулсан гэж үзэх хүн байна. Ямартаа ч энэ үйл явдлаас ажиглавал Өвөрхангайд тийм ч танил, нөлөөтэй биш С.Чинзориг, Н.Төмөрхүү нар МАН-ын хүчээр гарч ирээгүй бололтой. Харин АН дотор өрнөсөн зөрчил дундаас хожоо хийсэн аж.