МАН-ыг ялагдсаны хариуцлагыг хүлээх хүн олдохгүй байгаа гэж эх сурвалж мэдээллээ. Учир нь МАН-ын удирдлагууд хариуцлага хүлээхээсээ бултаж “бидний буруугаас болж ялагдаагүй. Бодлого буруу байснаас ялагдаагүй. Сонгуулийн машинаас болж ялагдсан. Тиймээс хариуцлага хүлээх учиргүй” гэж ярилцсан сурагтай. Тиймээс л сонгуулийн санал хураалтыг тоолуулахаар маргалдаж байгаа аж.
   Уг нь МАН-ыг ялагдвал удирдлагууд нь хариуцлага хүлээх ёстойг өөрийн дүрэмдээ тодорхой зааж өгсөн байдаг гэнэ. Үүний зэрэгцээ МАН нэрээ сольдог түүхэн их хурлын үеэр ерөнхий нарийн бичгийн дарга У.Хүрэлсүх “МАН нэрээ сольсноос болж ялагдвал хариуцлагыг нь би хүлээнэ” гэж түмэн олны өмнө хэлсэн. Тэгвэл тэрбээр энэ үгнээсээ буцаж эхэлсэн гэнэ. Тэрбээр намын нэр сольсноос болж ялагдвал л хариуцлага хүлээнэ гэсэн болохоос зүгээр байж байгаад ялагдвал би хариуцлага хүлээнэ гэж хэлээгүй гэж бултаж байгаа сурагтай. Уг нь МАН нэрээ сольсноос болж хоёр хуваагдсан. Н.Энхбаяр намаасаа гарч МАХН гэсэн хуучин нэрээ сэргээн авсан. Үүний зэрэгцээ Ч.Улаан, Д.Тэрбишдагва, О.Чулуунбат зэрэг гишүүд нь МАХН-д элссэн. Энэ бүхнээс болж МАН ялагдал хүлээлээ. Тиймээс У.Хүрэлсүх хариуцлага хүлээнэ гэж хэлснийхээ дагуу хамгийн түрүүнд ажлаасаа чөлөөлөгдөх учиртай гэж намынх нь нөхөд үзэж байгаа. Гэвч У.Хүрэлсүх хариуцлага хүлээх шинжгүй харин ч шадар сайд болох сонирхолтой байгаа гэнэ. Хэрэв МАН шинээр байгуулагдах Засгийн газарт орвол У.Хүрэлсүх шадар сайд болохоор яригдаж эхэлжээ.
   Тэрбээр хуулийн дагуу УИХ-ын гишүүн болох эрхтэй байгаа. Энэхүү эрх нь багадаад хамтарсан Засгийн газар байгуулаад шадар сайд болохоор хөөцөлдөж байгаа бололтой. Гэвч түүнийг шадар сайд болохыг ерөнхийлөгч Ц.Элбэгдорж өмнө нь зөвшөөрөөгүй. Энэ удаа ч гэсэн ямар нэгэн шалтаг тооцоод зөвшөөрөхгүй гэж намынх нь зарим ажиглагчид үзэж байгаа гэнэ.
   Юутай ч гэсэн У.Хүрэлсүх хариуцлагыг нь би хүлээнэ гэж ард түмний өмнө хэлсэн үгнээсээ ард түмний өмнө бултах бололтой байна. Үүний зэрэгцээ түүнээс “МАН нэрээ сольсноос болоод сонгуульд ялагдвал хариуцлагыг нь хэн хүлээх вэ?” гэсэн асуулт асуусан сэтгүүлчийг ойр дотных нь хүмүүс ихэд буруутгаж эхэлсэн байна. Дэмий асуулт асууж, дэмий зүйл яриулсан гэж бодсоноос ийн буруутгаж байгаа бололтой.
Ийнхүү МАН-ын удирдлагууд сонгуульд ялагдсаныхаа хариуцлагыг хүлээхээс татгалзаж байгаа бол гишүүд нь эсрэг байр суурийг баримталж байгаа аж.
   Наадмын дараа эсвэл орон нутгийн сонгуулийн дараа МАН-ын их, бага хурлууд болно. Уг хурлаар сонгуульд ялагдал хүлээсний буруутанг хайж хариуцлагыг нь үүрүүлнэ. Тэр үед жинхэнэ буруутан нь тодорхой болно. Тэрнээс өмнө би буруутай гэж хэлэх удирдлага олдохгүй бололтой.