Өнгөрсөн долоо хоногт болсон сонгуулиар ард түмэн аль нэг намд давуу эрх олгосонгүй. Харин дахин хамтрах боломжийг нээж өглөө. Харин санаачлагыг нь АН-д олгов. Санаачлагыг олгосон гэдэг нь арай илүү суудал олгосоноос үүдэх эрх юм. Тиймээс АН-ын дарга Н.Алтанхуяг амралтын өдөрүүдэд баяраа тэмдэглэхийн зэрэгцээ дараагийн Засгийн газрынхаа хар зургийг гаргаж, хувь заяаг нь тодорхойлохоор намынхаа нөхөдтэй зөвлөлдөж эхэлжээ.
    МАН-тай хамтрах уу? эсвэл МАХН-МҮАН-ын шударга ёс эвсэлтэй хамтрах уу? гэдэг талаар мэргэ төлөг буулгахаас наагуур юм болж байгаа бололтой. Хамгийн түрүүнд парламентад 10 гаруй суудал аваад байгаа МАХН-МҮАН-тай хамтрах талаар бодож эхэлсэн байна. Энэ бодлогынхоо хүрээнд АН-ын дарга Н.Алтанхуяг МАХН-ын дарга Н.Энхбаяртай утсаар ярьж, уулзалт товлож хамтарсан Засгийн газар байгуулахаар хэлэлцээр эхлүүллээ гэж эх сурвалж мэдээллээ.
  Н.Алтанхуягийн санаачлагыг Н.Энхбаяр тун болгоомжтой хүлээн авч, нөхцөл байдлыг сайн шинжлэх ёстой гэсэн байр суурийг баримталж буй бол ядарсан үед нь тус болсон намынх нь нөхөд тун ч баяртай байгаа гэнэ. Тиймээс л УИХ-ын гишүүн Ч.Улаан тэргүүтнүүд яаран сандран хэвлэлийн хурал зарлаж шинээр байгуулагдах Засгийн газарт уриалгахан орно гэдгээ мэдэгдээд авав.
   Харин Н.Энхбаяр долоо хэмжиж нэг огтлоно гэсэн бодлого баримталж байгаа бололтой. Тэрээр Засгийн газарт орвол МАХНАН болж шүүмжлээд байсан МАНАН болно гэдгээ ойлгож байгаа гэнэ. Өмнө нь МАНАН-гийн Засгийн газрыг шүүмжилж явсан хүн өөрөө МАХНАН-гийн Засгийн газрыг байгуулахаар хэлэлцээр хийх нь шударга явдал мөн үү? гэж ам асуухаас ихээхэн эмээж байж мэднэ. Юутай ч гэсэн Н.Энхбаяр Н.Алтанхуягийн “хуримын урилга”-ыг баярлан хүлээн авсангүй.
   Үүний зэрэгцээ Н.Алтанхуяг, Н.Энхбаярын шинэ “болзоо”-г ерөнхийлөгч Ц.Элбэгдорж таатай хүлээн авахгүй байгаа гэнэ. Тиймээс АН-ын удирдлагыг дуудан уулзаж болчимгүй үйлдэл хийхээ зогсоохыг үүрэгдсэн байна. Учир нь та нар МАХН-МҮАН-тай юу бодож эвсэж байна? Эвслээ ч танай Засгийн газрын хувь заяа бүрхэг байна. Тэгээд ч ирэх 2013 онд эвслээс би ерөнхийлөгчид нэр дэвшинэ. Та нар намайг дэмжих гээд байна уу? Н.Энхбаярыг дэмжих гээд байна уу? гээд бодлогоо тодорхой болгоорой. Ийм хэлэлцээр хийхийн оронд МАН-ын удирдлагатай учраа ол гэсэн утгатай заавар зөвлөгөөг өгсөн гэсэн яриа саарал ордноор таржээ. Үнэн худлааг гэрчлэх хүн одоогоор гарч ирээгүй байна. Удахгүй хэлэлцээрийн талаар илүү тодорхой мэдээлэл гарах биз.  
    Ийнхүү АН, МАХН-МҮАН-ын хэлэлцээр амжилт муутай эхэллээ. Хэрвээ энэ хоёр нам эвсвэл 1996-2000 он давтагдаж жилд нэг Засгийн газар огцордог болно. Ерөнхий сайд болох хүсэлтэй хүмүүст энэ нь сайхан шийдвэр ч байж мэднэ. Гэвч улс орны хөгжлийн том төслүүд зогсч, эдийн засаг хүндэрч, ард иргэдийн амьжиргаа муудах болно. Тиймээс л Ерөнхийлөгч Ц.Элбэгдорж АН-ын удирдлагуудад заавар зөвлөлгөө өгч эхэллээ. Удахгүй АН-ын удирдлага өөрсдийнхөө шийдвэрээр асуудалд хандах уу? Ерөнхийлөгчийн зөвлөлгөөг дагах уу? гэдэг нь тодорхой болно.