“Эрдэнэс Тавантолгой” компанийн хувьцааг үндэсний ах ажуйн нэгжид худалдаах ажил өнгөрсөн тавдугаар сарын 28-ний өдөр эхэлсэн. Энэ ажил өнгөрсөн ням гараг буюу зургадугаар сарын 30-ны өдрөөр дуусгавар болсон.  Энэхүү ажлын эцсийн дүн гараагүй хэдий ч зургадугаар сарын 29-ны байдлаар нийтдээ 93 сая ширхэг хувьцааг 3000 гаруй аж ахуйн нэгж худалдаж авах захиалгаа ирүүлсэн аж. Мөнгөн дүнгээр бол 18.8 тэрбум төгрөг одоогийн байдлаар ҮЦТТТ-ийн дансанд ороод байгаа гэнэ.  Компаниудын худалдаж авах хувьцааны хувьд “Эрдэнэс Таван толгой”-н 15 тэрбум ширхэг хувьцаа байгаа юм байна. Үүний 10 хувийг нь 41390 аж ахуйн нэгжид худалдана гэсэн тооцоо гарчээ.  Түүнчлэн 2012 онд татвараа төлсөн компани бүрт хувьцаа худалдаж авах эрх өгч байгаа. Хувьцааны хувьд хязгаарлалт тавихын тулд нэг компанид 36240 ширхэг хувьцааг л худалдах юм байна.  Маргааш гэхэд хэчнээн аж ахуй нэгж хэдэн ширхэг хувьцаа худалдаж авсан талаар дэлгэрэнгүй мэдээллийг Татварын ерөнхий газраас  Сангийн яам, Засгийн газарт тайлагнах юм.