1.Болгарын гаалийн ажилтнууд 4.2 тонн гашиш ачсан автомашиныг саатуулжээ. Болгараас Бельги рүү хил давах гэж байсан уг машиныг 42 настай эр жолоодож явсан байна. 132 хайрцагт хуваан хийсэн их хэмжээний мансууруулах бодисыг барилгын материал дотор нуусан байжээ. Энэ хэрэгт холбоотой байж магадгүй гурван хүнийг саатуулаад байна.

2.Косово ирэх есдүгээр сард тусгаар тогтнолоо зарлана гэж Австрийн Гадаад хэргий сайд Михаэль Шпинделеггер Венад болсон Косовогийн асуудлаарх олон улсын хурлын үеэр мэдэгджээ. Олон улсын ажиглагчид есдүгээр сард  Приштинад ёслолын хурал хийж, Засгийн эрхийг Косовогийн Парламентад бүрэн шилжүүлэх гэнэ. Тэр хүртэл Косовогийн эрх баригчид үндсэн хуульдаа өөрчлөлт оруулах ёстой аж.

3.Венесуэлийн ерөнхийлөгчийн ордонд ажиллаж байсан эмч Ане Марин Абреуг улсын нууц задруулсан хэргээр саатууллаа. Сүүлийн 12 жил ерөнхийлөгчийн ордонд ажиллаж буй тэрбээр гэм буруутай нь нотлогдвол долоогоос 10 жилийн ял сонсож магадгүй байна. Ане Марин Абру ямар нууц мэдээлэл хэнд дэлгэсэн талаар хууль сахиулагчид нууцалж байгаа юм.

4. Их Британийн хатан хаан II Элизабета болон түүний гэр бүлийнхний зарлага өнгөрсөн оныхтой харьцуулахад 200 мянган фунтээр нэмэгдсэн тухай хатан хааны санхүүгийн тайланд дурдсан байна. 2010-2011 оны санхүүгийн жилд татвар төлөгчид хатан хааны гэр бүлийнхний хэрэгцээнд зориулан 32.3 сая фунт төлсөн нь өнгөрсөн онынхоос 0.6 хувиар өссөн үзүүлэлт аж. Түүний зэрэгцээ Хатан хааны гэр бүлийн өмч хөрөнгө 11.9 саяас 12.2 сая фунт хүртэл нэмэгдсэн байна.

5. Шинжаан-Уйгарын өөртөө засах оронд онгоц барьцаалах үйлдлийг таслан зогсоосон арван зорчигчийг Хятадын Засгийн газар тус бүрд нь 100 мянган юаниар урамшуулсан байна. Хотан-Өрөмч чиглэлд нисч байсан уг онгоцыг өнгөрөгч баасан гарагт зургаан этгээд барьцаалахыг оролдсон аж. Онгоцонд тэд тэсрэх бодис оруулж, дэлбэлэхийг завдсан юм. Тус онгоцонд 92 зорчигч, багийн 10 гишүүн явсан байна.