“Долдугаар сарын 1”-ний хэрэгт буруутгагдаж, анхан шатны шүүхээс ял сонссон цагдаагийн экс дарга нар өнөөдрийг хүртэл ялыг тогтоолоо аваагүй байгаа. Өнгөрсөн сарын 7-нд Сүхбаатар дүүргийн шүүхээс тэдэнд 2.6-3.6 жилийн хорих ял ногдуулсан. Хэрвээ ялын тогтоолоо авбал давж заалдана хэмээн ар гэрийнхэн нь мэдэгдэж байсан. Гэвч ялын тогтоолоо аваагүй учраас ийнхүү давж заалдахгүй байгаа аж. Хуулиндаа шүүхийн шийдвэр гарснаас 10 хоногийн дотор ялын тогтоолыг өөрсдөд нь өгөх ёстой гэнэ. Гэвч хурлыг даргалагч шүүгч Ч.Хосбаяр хөдөө сургалтад явсан, мөн туслах шүүгч нь эмнэлэгт хэвтсэн гэсэн шалтгаанаар өгөхгүй байсан.
Харин тэд нэгэнт ирсэн учраас ялын тогтоолыг бэлэн болгосон ба энэ долоо хоногт багтаан ялын тогтоолыг гардуулахаар болсон байна. Тэгэхээр Ч.Амарболд, Ш. Батсүх, О.Зоригт нар ялын тогтоолоо аваад давж заалдах шатны шүүхэд гомдол гаргах аж. Хуулиндаа ялын тогтоолыг гардаснаас 14 хоногийн дотор давж заалдах эрхтэй хэмээн заажээ.
Б.Чимэг
