2012 оны УИХ-ын сонгуульд 76 суудлын гурвыг нь бие даагчид авсан. Тэр дундаа МАН-аас тойроггүй үлдсэн хоёр гишүүн бие даан нэр дэвшиж ялалт байгуулсан юм.
Хөвсгөл аймагт УИХ-ын гишүүн Ц.Даваасүрэн бие даан нэр дэвшсэн. Тэрээр “Ганц дайчин ганцаарддаггүй”-н жишээг харуулж чадсан эрхэм. Учир нь өнгөрсөн дөрөвдүгээр сарын 13-нд МАХН-ын дарга Н.Энхбаярыг АТГ-аас баривчилсны дараа Хууль зүй, дотоод хэргийн сайд Ц.Нямдорж, намынхаа бодлогыг шүүмжилж байсан нэгэн. Мөн Д.Тэрбишдагва, О.Чулуунбат, Ч.Улаан зэрэг буйраа сэлгэсэн гишүүдтэй хамт Н.Энхбаярыг суллах ёстой хэмээн хэвлэлийн бага хурал зарлаж байсан. Түүнчлэн уг гишүүдтэй хамт МАХН-д элсэх тухай ч хэвлэлээр нэг цацагдаж байсан билээ. Гэвч тэрээр Ч.Улаан, Д.Тэрбишдагва, О.Чулуунбат нар шиг МАХН-д оролгүй МАН-даа үлдсэн. Харин МАН, МАН-ын ёс зүйн хороо Ц.Даваасүрэнг Бага хурлын гишүүнээс хасч орхисон сонин үйл явдал болсон юм. Тиймээс Ц.Даваасүрэн гишүүн наашаа ч үгүй, цаашаа ч үгүй болж, эцсийн мөчид Хөвсгөл аймгаас бие даан нэр дэвшиж, 34.62 хувиар ялалт байгуулан гарч ирсэн билээ.
Мөн түүнтэй нэг намын удирдлага дор явж байгаад тойроггүй үлдсэн ижил хувь заяатай нэгэн бол “Дорнод гурил” ХХК-ны захирал Х.Болорчулуун. Тэрээр хоёр жилийн өмнө МАН-ын дарга С.Батболд аймагт нь зочлох үеэр МАН-д элсэж байсан юм. Гэсэн ч олон хүний адил тойрог авч чадалгүй ганзага хоосон буцсан нэгэн. Харин тэрээр мөн л зориг гарган Дорнод аймагт бие даан нэр дэвшсэнээр 42.68 хувийн саналаар ялалт байгуулан гарч ирсэн юм. Түүнийг Дорнод аймгийн хүнсний зах зээлийг атгасан хүн аймагтаа бас ч гэж байр суурь, нэр нөлөөтэй хэмээн ярьдаг. Ийнхүү Ц.Даваасүрэн, Х.Болорчулуун нар намаасаа тойроггүй үлдсэн ч бие дааж өрсөлдсөнөөр ялалт байгуулсан. Харин тэднийг ялалт байгуулсныг нам нь мэдсэн даруйдаа намдаа хэрхэн эргүүлэн татахын тулд санаа тавьж эхлээд байсан. Харин Ц.Даваасүрэн намдаа эргэж орохгүй гэдгээ мэдэгдээд байгаа билээ.
Бие даагчдаас хамгийн өндөр санал авсан эрхэм бол МҮЭХ-ны ерөнхийлөгч С.Ганбаатар. Тэрээр Монголын үйлдвэрчний эвлэлийн ерөнхийлөгч болсон цагаасаа л УИХ-д нэр дэвшихгүй гэсэн аман амлалт өгч байсан. Гэсэн ч тэрээр энэ жилийн сонгуульд Дархан-уул аймгаас бие даан нэр дэвшиж, 53.8 хувийн саналаар ялалт байгуулсан. Юутай ч “УИХ-д ороод ямар хуулин дээр ажиллах юм, тэр хуулиа ямар үндэслэлээр иргэдийн төлөө яаж шийдэх юм. Ажилтай байлгахын төлөө ямар хууль батлах уу, эрүүл мэндийн төлөө хэрхэн тэмцэх үү гэдгээ тодорхой болгож байж орно. Ард түмний итгэлийн элч болж ирчихээд Казиногийн хууль батлаад байвал болохгүй биз дээ? Тэгэхээр иргэдийнхээ захиа, даалгаваар л би тийшээ явна. Түүнээс Ганбаатар гэдэг хүн Ганбаатарыг төлөөлж орвол гутамшиг” хэмээн ярьж байв.Б.Чимэг
