УИХ-ын сонгуулийн өмнө УИХ-д нэр дэвшихээр зэхэж байсан хэд хэдэн эрхмийг АТГ-аас баривчилсан. Тодруулбал, “Сод Монгол” группын ерөнхийлөгч Д.Анандбазарыг өнгөрсөн тавдугаар сарын 24-нд МАН-ын бага хурлын дараа саатуулсан. Тэрээр Дорноговь, Говьсүмбэр аймагт нэр дэвших мандатаа аваад байсан билээ. Түүнийг ямар үндэслэлээр саатуулсан нь одоо хүртэл тодорхойгүй байгаа. Харин түүнийг өнгөрсөн долоо хоногт батлан даалтад гарсан, мөн түүний хэргийг Нийслэлийн прокурорын газраас хэрэгсэхгүй болгосон хэмээн хэвлэлээр цацагджээ. Энэ талаар Нийслэлийн прокурорын орлогч Е.Сагсайгаас тодруулахад, “Хэвлэлээр Д.Анандбазарыг батлан даалтад гарсан, хэрэг нь хэрэгсэхгүй болсон хэмээн гарсан байна. Хаанаас ийм мэдээлэл гарсаныг мэдэхгүй байна. Д.Анандбазар батлан даалтад гараагүй. Хэргийг нь шалгаж байгаа. Хэрэгсэхгүй болсон зүйл байхгүй” гэлээ. Б.Чимэг
