Ашигт малтмалын газрын дарга асан Д.Батхуягт АТГ-аас эрүүгийн хэрэг үүсгэн шалгаж, өнгөрсөн тавдугаар сарын 7-ноос сэжигтнээр тооцон Төв аймгийн урьдчилан хорих төвд саатуулсан билээ. Харин тэрээр өөрийг нь улс төрийн зорилгоор шалгаж буйг зогсоох ёстой хэмээн шаардаж өлсгөлөн зарласан тухай хэвлэлээр цацагджээ. Энэ талаар АТГ-ын Тамгын газрын дарга Ч.Өнөрбаяраас тодруулахад “Д.Батхуяг өлсгөлөн зарласан гэх мэдээлэл ташаа мэдээлэл. Түүнийг өлсгөлөн зарлаагүй гэдгийг албан ёсоор мэдэгдэж байна” гэлээ.
Д.Батхуягийг өнгөрсөн оны сүүлээр Эрүүгийн байцаан шийтгэх хуулийн 264 дүгээр зүйлийн хоёр дахь хэсэг буюу төрийн албан тушаалтан эрх мэдлээ хэтрүүлсэн гэх үндэслэлээр хэрэгт татан шалгаж байсан ч прокурорын хяналтын шатанд хэрэгсэхгүй болгож байсан юм. Мөн Ашигт малтмалын газрын дарга байхдаа 43 тусгай зөвшөөрлийг хууль бусаар сэргээсэн, "Гол мөрний урсац бүрэлдэх эх, усан сан бүхий хамгаалалтын бүс, ойн сан бүхий газар, ашигт малтмал хайх, ашиглахыг хориглох тухай хууль" хэрэгжиж, ашигт малтмалын хайгуулын болон тусгай зөвшөөрөл олгохыг тодорхой хугацаагаар хориглосон журам гарсан үед эрх мэдлээ ашиглан 192 зөвшөөрөл олгосон гэх хэрэгт шалгаж байв. Уг хэргүүдийг сэргээсэн учраас ийнхүү шалган, цагдан хорьсон билээ.
Б.Чимэг
