Комьпютер, программ хангамжийн зах зээлд аль хэдийнээ байр сууриа олж, тэргүүлэгч болсон Microsoft корпораци шинэ үйлдлийн системээ худалдаанд гаргах тухай өмнө нь мэдэгдэж байсан. Өчигдөр Корпорацийн захирал Стив Баллмер Windows 8 үйлдлийн системийнхээ тухай товч танилцуулга хийсэн байна.
   Тэрээр шинэ үйлдлийн систем бүхий комьпютерийг ирэх 10 дугаар сард худалдаанд гарахаар төлөвлөсөн  талаар  мэдээлэл хийлээ. Түүний хэлж байгаагаар шинэ үйлдлийн систем таблет буюу ухаалаг гар утас хэрэглэгчдэд зориулагдсан бүхий л хэрэглээг багтаасан байх юм байна. Текст бичих, хүснэгт татах, мэйл хаягаа шалгах гээд өдөр тутмын хэрэглээний программуудыг та гэрийн компьютер, лап топ, гар утаснаасаа чөлөөтэй ашиглах боломжтой болох юм. Хамгийн гол нь ерөнхий функц нь интернэт дээр суурилсан байх тул та хэзээ л бол хэзээ, хаанаас бол хаанаас өөрчилж, шинэчлэх боломжтой гэдгийг Стив Баллмер хэлж байсан юм.
   Мөн тэрээр Windows 8 бусдыг гайхшруулж, цахим ертөнцөд тэсрэлт хийх болно, хэрэглэгчдийн өдөр тутмын амьдралын цахим хэрэглээг илүү хялбарчлах онцгой бүтээл болно гэдгийг дурджээ. Цахим хэрэглээний зах зээлд Apple корпораци өөрийн гол бүтээгдэхүүн болох IPAD-ыг хамгийн эрэлт ихтэй бүтээгдэхүүн болгож чадсан бол Microsoft компани Surface-ыг шилдэг нь болгохын төлөө ажиллаж байна. Хэрэглэгчид Sky Drive үйлчилгээг ашиглаж программын ерөнхий бүтцийг өөрчлөх юм. Та комьпютертаа шинэ функц суулгасан ч өмнөх программыг устгалгүй хадгалж үлдэх давуу талтай гэнэ.