Зам, тээврийн хөгжлийн сайд Д.Ганбат, дэд Б.Цогтгэрэл, Нийслэлийн засаг дарга бөгөөд Улаанбаатар хотын  захирагч С.Батболд, ИТХ-ын дарга Ц.Сандуй, нарын албаны хүмүүс өнгөрөгч Баасан гарагт Толгойт-Амгалан хоорондох УБТЗ-ын гол замд тусгай галт тэргээр явж, нийслэл дундуур өнгөрдөг төмөр замын дагуух нөхцөл байдалтиаөй танилцлаа.  Энэ үеэр УБТЗ-ын дарга Д.Жигжиднямаа тэргүүтэй албаны хүмүүс хамт явж дээрх замын дагуу үүсээд буй хүндрэлтэй нөхцөл байдал, эрсдэлтэй цэгүүдийг танилцуулан цаашид авч хэрэгжүүлэх арга замуудын талаар санал, солилцлоо. Төмөр замын зурваст газар олгосноос болж галт тэрэгний хөдөлгөөнд ноцтой аюул учирч, цаашлаад ард иргэдийн эрүүл, аюулгүй орчинд ажиллаж, амьдрах эрх ч ноцтойгоор зөрчигдөж байгаа юм. Уг нь, 1949 оны гэрээгээр зурвас газарт төмөр замаас баруун, зүүн тийш 120 метр (нийт 240 метр) газар чөлөөтэй байх тухай заасан байдаг аж. Энэхүү зурвас нь төмөр замаа өргөжүүлэн хөгжүүлэх, хос болгоход зориулалттай. Гэтэл бодит байдал дээр хавтгайрсан газар олголтын харгайгаар дээрх заалт зөрчигдөөд зогсохгүй галт тэрэгний аюултай бүс буюу баруун, зүүн тийш 50 метр зайгаас ч дотогш нэвтэрэн,  барилга байгууламжийг олноор барих  болжээ.

Энэ үеэр Зам тээврийн хөгжлийн сайд Д.Ганбат "УБТЗ ХНН-ийг анх байгуулахдаа баталсан 1949 оны гэрээ өнөөдөр хүчин төгөлдөр мөрдөгдөж байгаа. Уг хэлэлцээрийг өнөөгийн нийгэм эдийн засгийн нөхцөл байдалтайгаа уялдуулан шинэчлэх зүй ёсны шаардлага гарч байна. Хэлэлцээрийг шинэчлэх саналаа Оросын талаар зөвшөөрүүлээд Монгол Улсын Ерөнхий сайдын захирамжаар байгуулагдсан ажлын хэсэг боловсруулалтын түвшинд ажиллаж байна. Газрын асуудал одоогоор 1949 оны гэрээнд заасны дагуу явж байгаа учраас нийслэлийн удирдлагуудтайгаа төмөр замын зурвас газраараа явж танилцан, гэрчилгээжүүлэх, тулгамдсан асуудлуудыг алхам алхмаар шийдэх зэрэг чиглэлийг барьж ажиллаж байна. Түүнээс гадна БНХАУ-ын хөнгөлөлттэй зээлээр хэд хэдэн гүүр барина. Ингэснээр авто зам болон төмөр замыг хоёр түвшинд огтлолцуулах боломж бүрдэнэ. Энэ ажлын үр дүнд авто замын түгжрэл ч тодорхой хэмжээнд багасна гэж үзэж байгаа" гэв.

Улаанбаатар хотын  дундуурх төмөр замаар хуурай мод, нефть, шингэрүүлсэн хий гээд олон төрлийн аюултай ачаа тээвэрлэгддэг. Иймд нийслэлчүүд болоод УБТЗ-ынхны хувьд аюулын харанга дэлдэж ойрхон байгааг үгүйсгэж болохгүй. Нөгөөтэйгүүр гүүрэн болоод хонгилон гарц хангалттай хэмжээнд байдаггүй, ард иргэдийн дунд галт тэрэгний аюултай бүсийн дэглэмийн талаарх ойлголт хомс зэргээс үүдэн хүний амь наса алдах, осолдох  эрсдэл ч нэмэгдэж буйг УБТЗ-ынхан хотын удирдлагуудад тайлбарлав. Энэ тухайд УБТЗ-ын дарга Д.Жигжиднямаа "Төмөр замын зурвас газар болон аюултай бүсээс дотогш хууль бусаар  газар олгож байгаа нь төмөр замын аюулгүй байдал, цаашдын хөгжил дэвшилд саад болж байгаа юм. Хос зам тавилаа гэж бодоход маш хязгаарлагдмал болгож байна. Дур зоргоороо төмөр зам руу шахаж барилга байшин барих явдал ихэссэн учраас бид хотын захиргаатайгаа ярилцаж байгаад хамтарсан шийдэл гаргая гэсэн хүсэлт тавьсан. Хүсэлтийг маань Зам, тээврийн хөгжлийн яам болон Хотын захиргааныхан хүлээж аваад ийнхүү өргөн бүрэлдэхүүнтэйгээр байдалтай танилцаж байна. Төмөр замын зурвас газраас дотогш барилга байгууламж барьсан аж ахуй нэгжийн удирдлагуудтай уулзахад ямар нэгэн хэлбэрээр зөвшөөрлийг нь авсан байдаг. Тиймээс дээрх зөвшөөрлийг олгоод байгаа газартай нь зөвшилцөж, чөлөөлүүлэх шаардлага тулгараад байна" хэмээн ярилаа.

Нөхцөл байдалтай газар дээр нь танилцаж явах үеэр ялангуяа "Нарантуул", "Барс-2", "Хархорин" зэрэг худалдааны төвүүдийн орчимд иргэд төмөр замын хашааг давах, шургах нь энгийн үзэгдэл мэт болсон нь харагдсан.  Төмөр замын аюултай бүсэд орон гэргүй, согтуу иргэд зорчиж яваад амь насаа алдахад  ч хүргэж болзошгүйн тод жишээ бэлээхэн харагдаж байлаа. Толгойт өртөөний орчмоор л гэхэд хоногт 300-600 хүн төмөр зам дээгүүр зам огтлон гардаг. Гэтэл уг замаар хоногт дунджаар 53 галт тэрэг явж өнгөрдөг учраас маш аюултай нөхцөл үүсээд буй юм. Иймд авто зам, төмөр зам огтлолцсон хэсэгт гүүрэн болон хонгилон гарц барих, явган зорчигчдын төмөр зам хөндлөн гарах хөдөлгөөнийг цэгцлэх, зөвшөөрөлгүй газар олголтуудыг цуцлах зэрэг олон асуудалд нийслэлийн удирдлагын туслалцаа дэмжлэг, хамтын ажиллагаа чухал болсныг тухайд  холбогдох албаны хүмүүс санал нэгдэв.