АН-тай хамтарч Засгийн газар байгуулах гэж буй “Шударга ёс” эвслээс олон зүйл шалтгаалах эгзэгтэй үе ирээд байна. Тус эвслийн дарга Н.Энхбаярт шүүхээс дөрвөн жилийн ял оноосныг намын гишүүд нь эсэргүүцэж, улс төрийн хэлмэгдүүлэлт гэж үзэж байгаа. “Шударга ёс” эвслийг намын даргаа өмөөрч Засгийн газарт орно гэсэн гэрээгээ цуцлах уу, эсвэл Н.Энхбаярыг зөнд нь хаяад сайдын суудлаа авцгаах уу гэдэг олны анхаарлыг татаж байна. УИХ-д олонхи болсон АН-ын зүгээс Засгийн газрын бүтцийг ерөнхийлөгчтэй зөвшилцөн байгуулахаар бэлдэж байгаа. Тиймээс “Шударга ёс” эвсэл хамтарсан Засгийн газар байгуулна гэсэн гэрээнээсээ буцахгүй байх гэсэн хүлээлттэй байгаа бололтой. Гэтэл өмнө нь зарим ажиглагчдын таамаглаж байснаар МАХН-МҮАН-ы “Шударга ёс” эвсэл дотроо хагарах зарим нэг шинж тэмдэг үзэгдэж эхэллээ. Өчигдөр М.Энхсайханы МҮАН улс төрийн хүчнүүдээс хамгийн түрүүнд МАХН-ын дарга Н.Энхбаярт ял оноосонд харамсаж, дээд шатны шүүх шийдвэрээ засна гэдэгт итгэж буйгаа зоригтойгоор илэрхийлсэн юм. Үүний хажуугаар “Хэдийгээр хүндрэлтэй нөхцөл байдал үүссэн ч Ардчилсан нам, Иргэний Зориг Ногоон нам, “МАХН-МҮАН Шударга Ёс Эвсэл”-ийн зүгээс улс орны эрх ашгийг урьтал болгон ард түмний сонголтод тулгуурлан байгуулсан хамтын ажиллагааны гэрээнийхээ дагуу сонгогчдын өмнө амласан мөрийн хөтөлбөр, зорилтуудыг хэрэгжүүлэх ажилдаа цаг алдахгүй орох ёстой гэж үзэж байна” гэв. Өөрөөр хэлбэл Н.Энхбаярын асуудал хамаагүй ээ, сайдын суудлаа аваад ажилдаа оръё гэсэн хэрэг. Ингэж түргэдснээрээ МҮАН өөрсдийн далд санаагаа олонд харуулчихав. Сонгуульд эвсэж орсон МАХН-ынхан нь хүн чанар ярьж засгаас гарна гэх вий дээ гэж МҮАН-ын зарим гишүүд дотроо ихэд харамсаж, харамссандаа ийнхүү яаравчлан мэдэгдэл хийсэн сурагтай. Тэгээд ч МҮАН бол АН-аас гаралтай. АН-тай эргээд нийлвэл “төөрч яваад гэртээ ирлээ” гэдэг шиг тийм ч сонин содон зүйл болохгүй.
Харин МАХН-ынхан арай өөр бодолтой байгаа бололтой. Намын даргаа өмгөөлөх үү, сайдын суудалтай хоцрох уу гэж Удирдах зөвлөлийн гишүүд нь шийдэж чадахгүй цөөнгүй хоног хуралдлаа. Ядаж байхад З.Баянсэлэнгэ гишүүн, Н.Энхбаярын туслах Б.Тулга нарын ам түргэдэж Н.Энхбаярыг хэлмэгдүүлбэл Засгийн газраас гарна гэсэн гэрээ бий гэдгээ ахин дахин сануулан хэвлэлийн хурал хийж орхилоо. Гэхдээ эх сурвалж МАХН-ын томчууд тэднээс өөр бодолтой байгааг үгүйсгэхгүй байгаа юм.
Хэрэв “Шударга ёс” эвслээс гаргасан улс төрийн хэлмэгдүүлэлт хийвэл Засгийн газраас гарна гэсэн утгатай гэрээгээ дагана гэвэл улс төрийн тун сонин нөхцөл бий болох нь ээ. МҮАН-ынхан энэ шийдвэрийг нь хүлээн зөвшөөрөхгүй, сайдын суудалтайгаа үлдэхийг бодно. Тэгээд ч МҮАН УИХ дотроо МАХН-аас илүү гишүүдтэй болсон. МҮАН-аас угшилтай Д.Батцогт, Л.Цог, Н.Батцэрэг, С.Сономпил, Ц.Цолмон, Г.Уянга нарын 6 гишүүн АН-ын 31, ИЗНН-ын 2 гишүүн ингээд 39 буюу олонхийг бүрдүүлэх боломжтой болох юм. Харин МАХН-аас сонгогдсон Ч.Улаан, Д.Тэрбишдагва, З.Баянсэлэнгэ, О.Баасанхүү нарын гишүүд МАН-тай эвсэе гэвэл үгүйсгэх газар байхгүй. МАН-ын 25 дээр МАХН-ын дөрөв гээд 29-үүлээ эвсээд бас л хүчтэй сөрөг хүчин гарах боломжтой юм. “Шударга ёс” эвсэл АН-тай хамтарсан Засгийн газарт орох гэрээгээ цуцлах эсэх нь удахгүй тодорно. Энэ үед МҮАН, МАХН санаа нэгтэй байж чадах уу гэдэг улс төрийн өнгө төрхийг тодорхойлох болоод байна. Н.Энхбаярыг уруудаж, шүүхээс ял авсан даруйд МҮАН нүүрээ буруулж буй нь яах аргагүй улс төр л юм даа.
Т.Гэрэл /24tsag.mn/
