Олон Улсын Допингийн Шалгалтын Агентлаг(ITA)-аас Монголын чөлөөт бөхийн тамирчин Цэвээнсүрэнгийн Цогбадрахаас авсан шинжилгээгээр хүний биеийн тестостероны хэмжээг нэмэгдүүлдэг бодис илэрснийг долдугаар сарын 4-нд мэдээллээ. 

ITA-гаас мэдээлснээр, 2025 оны гуравдугаар сарын 29-нд Иорданы нийслэл Амман хотод болсон насанд хүрэгчдийн Ази тивийн аварга шалгаруулах тэмцээний үеэр Ц.Цогбадрахаас авсан сорьцоос уг хориотой бодис илэрчээ.

Тестостероны хэмжээг нэмэгдүүдэг эм, бодис нь Дэлхийн Допингийн Эсрэг Агентлагийн(WADA) Хориглосон бүтээгдэхүүний жагсаалтын S1.1 бүлэгт багтах анаболик андроген стеройд бөгөөд тамирчдыг тэмцээний өмнө болон дараа аль ч үед уг бүтээгдэхүүнийг хэрэглэхийг хатуу хориглодог. Энэхүү бодис нь булчин, хүч, тэсвэр, хурдыг нэмэгдүүлдэг андроген шинж чанартай стеройд юм.

Ц.Цогбадрахын хувьд Амманд болсон Ази тивийн аварга шалгаруулах тэмцээний 65 кг-ын жинд БНАСУ, Казахстан, Киргизстаны бөхийг ялаад  Японы тамирчин Кайсей Танабед 12:2-оор ялагдан мөнгөн медаль хүртээд байв.

ITA-гаас сэргээшийн шинжилгээний хариуг Ц.Цогбадрахад албан ёсоор хүргүүлсэн гэдгийг мөн мэдээлсэн байна.  Хэрвээ тухайн тамирчин хүсвэл “B” сорьцын шинжилгээ хийнэ.  Хэрэв В-сорьцыг  шинжилж, A-сорьцын үр дүнг баталбал, энэ нь албан ёсоор допингийн эсрэг дүрэм зөрчсөн тохиолдол гэж үзнэ.

Хэрэв В-сорьцын шинжилгээ хийхийг хүсэхгүй бол мөн адил дүрэм зөрчсөн тохиолдол гэж тооцогддог. Мөн, Дэлхийн Допингийн Эсрэг Дүрэм болон UWW-ийн допингийн эсрэг дүрмийн 7.4.1 дүгээр зүйлд заасны дагуу Ц.Цогбадрахыг аливаа тэмцээнд оролцох эрхэд нь түр зуур хориг тавьжээ.

Тамирчин энэхүү түр хоригийг эсэргүүцэж, цуцлуулах хүсэлт гаргах мөн эрхтэй байдаг юм. UWW-ийн допингийн эсрэг хөтөлбөрийг ITA-д хариуцуулан шилжүүлсэнтэй холбоотойгоор уг хэргийг бүрэн эхээр ITA хариуцан шалгаж байгаа юм байна.

Ц.Цогбадрахын хувьд Монголын чөлөөт бөхийн шигшээ баг, “Алдар” спорт хорооны тамирчин, гавьяат дасгалжуулагч Ц.Хосбаярын гарын шавь юм. Ц.Цогбадрах “Алдар” спорт хорооны чөлөөт бөхийн тамирчдаас сэргээшийн асуудалд холбогдсон хоёр дахь тамирчин болж байна.

Л.Сайнаа