Coldplay хамтлагийн тоглолтын үеэр дэлгэцээр харуулсан “kiss cam” буюу үнсэлтийн камер санаандгүйгээр шуугиан тарьж, гэр бүлтэй “Астрономер” гэх тек компанийн захирал, хүний нөөцийн дарга хоёрын харилцааг олон нийтэд дэлгэн харуулжээ. Хамтлагийн гоцлол дуучин Крис Мартин тэднийг хараад тайзан дээрээс "хайр дурлалын харилцаатай бололтой" гэж хүртэл хэлсэн байна.

Үнсэлтийн камерын дэлгэцээр Бостон хотын дэргэдэх Жилетт стадионд болсон тоглолтын үеэр Астрономер гэх хиймэл оюун ухааны өгөгдөл дээр төвлөрч үйл ажиллагаагаа явуулдаг компанийн гүйцэтгэх захирал Энди Байрон, хүний нөөцийн хэлтсийн дарга Кристин Кабот нарын тэврэлдэн суугаа дүрс гарч ирсэн юм.

Тэд дэлгэцэнд гарсан гэдгээ ухаараад Кабот нүүрээ таглан, Байрон харин хурдхан доош сууж нуугджээ. Анх Крис Мартин тэднийг хайр дурлалын сайхан мөчийг хуваалцаж байна гэж бодсон ч, тэдний гэнэтийн сандарсан хариу үйлдэл түүнийг эргэлзэхэд хүргэжээ.

"Хөөх, юу болж байна аа? Тэд харьцаатай юм уу эсвэл зүгээр ичимхий хүмүүс үү?" гэж тайзан дээрээс хэлж буй бичлэг TikTok дээр тархсан байна.

Тэрбээр цааш нь: “Өө, нээрэн үү? Бид буруу зүйл хийсэн байж магадгүй ээ,” хэмээн нэмж хэлжээ.

Кабот өнгөрсөн 11-р сард Астрономер компанид элсэх үед Байрон түүнийг 20 жилийн туршлагатай, "онцгой манлайлал" бүхий нэгэн хэмээн магтаж байжээ. 

Байрон нь Мэган Керриган Байрон гэх эхнэртэй, харин Кабот нь хуучин нөхөр Кеннет Торнбитоос 2018 онд салж, 2022 онд гэр бүлээ албан ёсоор цуцлуулсан байна. 

А.Сүх