Орон орны 120 гоо бүсгүй чуулсан “Дэлхийн мисс 2012” наадамд Монголыг төлөөлөн оролцож байгаа Хүсэлбаатарын Баярмаа авъяаслаг миссийн шалгаруулалтанд шилдэг 24-т багтаад байсан билээ. Тэгвэл өнгөрсөн бямба гарагт болсон дараагийн шатны тэмцээнд тэрбээр амжилттай оролцож авъяаслаг мисс тэмцээний шилдэг 15 бүсгүйн тоонд оржээ. Ингэснээр Х.Баярмаа “Дэлхийн мисс 2012” тэмцээний эцсийн шалгаруулалт болох өдөр Монголын нэрийг гарган өөрийн авъяасаа тайзан дээр үзүүлэх нь ээ.  Шилдэг  15-д Монгол, Панам, Ямайк, Норвеги, Макао, Хятад, Парагвай, Сирра Лионе, Филиппин, Куракао, Казахстан, Бразил, Сант Киттс болон Нэтис, Латви, Данийн бүсгүйчүүд орсон байна.

  Найруулагч Ц.Хүсэлбаатар, жүжигчин С.Өлзийхүү нарын урлагийн гэр бүлд өссөн, өөрөө жүжигчин мэргэжилтэй тул бусад оролцогчдоос нүүр хагарсан, урлагийн олон талын авъяастай гэдгээрээ ялгарч байгаа аж. Мөн тэрбээр загвар өмсөгч Ч.Содтуяагийн шавь тул загварын алхааны хувьд бусдаасаа дутахааргүй чадвартай гэж үнэлэгдэж байна.  Тиймдээ ч далайн эргийн үзүүлбэрийн шилдэг 40-д багтжээ.

 “Дэлхийн мисс 2012”-ын эцсийн шалгаруулалт 12 хоногийн дараа буюу наймдугаар сарын 18-нд Өвөр Монголын Ордос хотод болно. Тэнд цаг агаар халуун байгаа ч охидын өрсөлдөөн бүр халуун байгаа бололтой.