АНУ-ын Ерөнхийлөгч Б.Обама өчигдөр 51 насны төрсөн өдрөө тэмдэглэв. Тэрээр төрсөн өдрөөрөө өөртөө амрах эрх өгч, Кэмп Дэвид баазад гольф тоглож өнжжээ. Төрсөн өдрийнхөө өглөө Б.Обама уламжлал ёсоор эх орон нэгтнүүддээ хандан радиогоор үг хэлжээ. Ярианы сэдэв олимпийн тоглолтын тухай байжээ.
Түүнтэй хамт хамгийн дотнын найз нар нь болон туслахууд нь гольф тоглосон байна. Орой нь Кэмп Дэвид дэх өргөөндөө гэргий Мишель болон дотнын тун цөөхөн хүний хамт зоог барьжээ. Харин охид нь зуныхаа амралтаар хүүхдийн зусланд амарч байгаа аж. Төрсөн өдрийнхөө өмнөхөн Б.Обама Флорида мужид очиж, сонгогчидтой уулзахад мужийн иргэдийн төлөөлөгчид түүнд төрсөн өдрийн дуу дуулж өгчээ.

Ц.Болор