ОХУ-ын Ерөнхийлөгч В.Путин Холбооны  зөвлөлд жил бүр тавьдаг илтгэлийн 2018 оных саяхан болж, дэлхий даяар шуугиулан АНУ-ын зүгээс ихээхэн эсэргүүцэлтэй тулгараад байгаа билээ. Удахгүй энэ сарын 18-нд болох ОХУ-ын Ерөнхийлөгчийн ээлжит сонгуулийн өмнө В.Путиний хийсэн дээрх мэдэгдэл нь ОХУ-ын супер зэвсэглийн хүчин чадлыг дэлхий даяар зарлан тунхаглах, ингэснээрээ удахгүй болох Ерөнхийлөгчийн сонгуульд өөрийнхөө үнэмлэхүй ялалтыг улам баталгаажуулах гэсэн санаархал хэмээн НАТО болон АНУ-ын зүгээс зэмлэн буруушаасан юм. В.Путин илтгэлийнхаа үеэр ОХУ-ын цөмийн зэвсэглэлд шинээр нэмэгдсэн супер хүчин чадалтай зэвсэглэлүүдийн видео бичлэгийг хүртэл дэлгэн үзүүлсэн нь урьд өмнө гарч байгаагүй үзэгдэл болсон билээ. Ер нь бол ОХУ сүүлийн найман жилийн дотор цөмийн зэвсэглэлийн салбарт ихээхэн анхаарал хандуулж, хөрөнгө мөнгө ч сайтар хаясаны үндсэн дээр энэ салбарт АНУ-ыг сандраах хэмжээнд хүрээд байгааг Пентагоны  дээгүүр албан тушаалтнууд ч мэдэгдэж эхлээд байгаа юм. Ингээд В.Путиний танилцуулсан супер цөмийн технологуудыг танилцуулъя.

1.Стратегийн зориулалттай “Сармат” бол тив алгасагч, хүнд ангиллын баллистик пуужингийн цогц систем ажээ. Төрөл бүрийн цөмийн зэвсэг тээвэрлэх боломжтой, ямар ч төрлийн пуужингийн довтолгооны эсрэг хамгаалалтыг нэвтлэх чадвартай гэдгээрээ онцлог.

2.Агаарт суурилуулсан “Кинжал” пуужингийн цогцолбор нь 2000 км-ын алсад байгаа дурын байг хэт хурдан буюу цагт 12.2 мянган км цагийн хурдтайгаар устгах чадвартай систем зэвсэг гэнэ. Хэдийгээр ийм их хурдтай нисч явах үедээ ч чиглэлээ өөрчилж, ямар ч пуужингаас хамгаалах төхөөрөмжийг тойрон гарах чадвартай нь түүнийг өнөөдөр дэлхий дээрх энэ төрлийн жинхэнэ супер зэвсэглэл болгож байгаа ажээ.

3.”Авангард” бол РС-24 “Ярс” пуужингийн суурин дээр бүтээгдэж байгаа дараагийн загвар болох РС-26 загварын тив алгасагч, хүнд ангиллын баллистик пуужингийн систем аж. Уг пуужингийн гарааны жин нь 80-120 кг жинтэй ба 2000-6000 км-ын алсад байх дурын байг пуужингийн довтолгооноос хамгаалах системийг нэвтлэн усгах чадвартай гэнэ.

4.Мөн түүнчлэн ОХУ цөмийн хөдөлгүүртэй, ямар ч алсын зайд нисч хүрэх чадвартай пуужингийн системийг бүтээгээд дуусч байгаа гэнэ. Энэ пуужингийн онцлог нь маш нам өндөрт, ямар ч дуу чимээгүй нисч, маршрутаа дуртай үедээ өөрчилж, пуужингийн довтолгооноос эсэргүүцэн хамгаалах ямар ч системд баригдахгүй, түүнийг тойрон гарах чадвартай гэдгээрээ ихэд онцлог систем гэжээ.

5.ОХУ-ын тэнгисийн флот нь шумбагч хөлөг онгоцонд суурилсан цөмийн хөдөлгүүртэй шумбагч дроныг бүтээж байгаа аж. Уг нь дрон нь ямар ч алс зайд өчүүхэн ч чимээ гаргалгүйгээр, маш сайн маневртайгаар цөмийн цэнэгт бөмбөг тээвэрлэн далай доогуур явах чадвартай гэнэ.

6.2012 онд ОХУ-ын зэвсэгт хүчинд 290 мянган хугацаат цэргийн албан хаагч, 162 мянган гэрээт цэргүүд алба хааж байсан бол 2017 онд 240 мянган хугацаат цэргийн албан хаагч, 384 мянган гэрээт цэргийн алба хаагчтай болж, гэрээт цэргийн тоо 2.4 дахин нэмэгджээ.

7. Мөн түүчлэн алсын зайд байгаа байг устгах зориулалттай, маш өндөр нягтралтай, “Искандр-М” пуужингийн тоо 12 дахин нэмэгдсэн нь АНУ-аас давж гарсан үзүүлэлт ажээ.

8.ОХУ цэрэг зэвсэглэлдээ үлэмжхэн хөрөнгө мөнгө зарцуулж, энэ асуудлыг Ерөнхийлөгч В.Путин өөрийн биеэр хянаж цэгцлэх болсноор цэргүүдийн гар дээрээ хүлээн авсан шинэ зэвсэг техник, тусгай зориулалтын техник, хэрэгслийн тоо 3.7 дахин нэмэгдсэн гэдгийг ОХУ-ын Батлан хамгаалахын сайд С.Шойгу саяхан мэдэгсэн байдаг. Мөн энэ хугацаанд 80 нэгж тив алгасагч пуужин, 102 нэгж шумбагч завинд суурилуулсан баллистик пуужин, 3 нэгж “Борей” ангиллын дайралтын шумбагч завь, “Ярс” пуужингаар зэвсэглэсэн 12 хороог ОХУ-ын арми шинээр зөвсэглэлдээ хүлээн авсныг ОХУ-ын Батлан хамгаалах яамны вэб сайтад мэдээлжээ.

Ийнхүү ОХУ-АНУ-ын цөмийн зэвсэглэлийн уралдаан шинэ шатанд гарч, улам л аюултай, улам л хүчирхэгжсээр байгаа юм. ОХУ-ын Ерөнхийлөгч В.Путиний саяын илтгэлийн хариуд АНУ-ын Батлан хамгаалах яам буюу Пентагоны зүгээс “Оросуудын өдөөн хатгалагад хариуг нь барих болно” хэмээсэн нь удахгүй тэд ч шинэ хүчтэй зэвсэглэлийг армидаа хүлээн авахын дохио гэж ойлгож болох юм.

Д.Түвшин