Өнөөдөр МАХН-МҮАН-ы “Шударга ёс” эвслийн УИХ дахь бүлгийн гишүүд хуралдлаа. Хурлын дараа бүлгийн дарга Н.Батцэрэгээс дараах тодруулгыг авлаа.

- Бүлгийн ээлжит хуралдаанаар ямар ямар асуудлыг хэлэлцэв?

- Өнөөдрийн бүлгийн хуралдаанаар ажлын албыг бүрэн байгуулж дууслаа. Бүлгийн ажлын албаны ажилтнуудад ажлын чиг үүрэг өгч, УИХ-ын намрын чуулган хүртэл  манай бүлгийн гишүүдээс санаачлах хуулийн төслүүд хяналт шалгалтын ажилд орж ажиллах ажлын хэсгүүдийн талаар гэх мэтчилэн олон зүйлээр санал солилцлоо. Мөн өнгөрсөн долоо хоногт Сүхбаатар дүүргийн шүүхэд болсон МАХНын дарга Н.Энхбаярт ял оноосон талаар гишүүд санал солилцсон. Анхан шатны шүүхийн практикт алдаа их гардаг юм байна. Тиймээс даргын хэргийг ч мөн алдаа болов уу гэж харж байна. Дээд шатны шүүхийн байгууллага гаргасан алдааг нь засаад явдаг. Тиймээс энэ хэргийг ч мөн давж заалдах шатны шүүхээс засна байх гэж найдаж байгаагаа гишүүд хэлсэн. Түүнчлэн бид АН, ИЗННтой хамтраад Засгийн газраа байгуулахаар яриа хэлцэл хийж, эхний уулзалтууд амжилттай болж, гэрээ байгуулсан. Гэрээг хамтарсан Засгийн газарт орж байгаа нам эвслүүдийн дээд байгууллагууд нь баталгаажуулаад явчихсан байгаа. Үүнтэй холбогдуулаад АН-ыг шүүх дээр гарсан шийдвэртэй холбогдуулаад байр сууриа илэрхийлээч ээ гэсэн санал АН-д тавьж байна. Өнөөдөр би бүлгийн дарга Д.Эрдэнэбаттай уулзаж, саналаа хэлсэн.

- Ямар хариу өгсөн бэ?

- Намынхаа удирдлагуудтай ярилцаж зөвлөлдөе гэсэн.

- “Шударга ёс” эвсэл Засгийн газарт орохгүй гээд байгаа?

- “Шударга ёс” эвслийн бүлгийн гишүүдээс хамтарсан Засгийн газартай байгуулахаар хийсэн гэрээнд эргэлзээтэйгээр хандсан гишүүн байхгүй. Харин АН болж буй үйл явц дээр ямар байр суурьтай байгааг сонсох нь зүйтэй болов уу гэж гишүүд хэлж байсан.  

- Өнгөрсөн долоо хоногт бүлгийн дэд дарга З.Баянсэлэнгэ мэдээлэл хийсэн?

- Бүлгийн дэд дарга УИХ-ын гишүүнийхээ хувьд өөрийнхөө байр суурийг илэрхийлсэн. Түүний ярьсан хэлсэн зүйлийг буруутгахгүй байгаа. Мэдээж намын даргад нь хилсээр ял оноочихсон байгаа үед байр сууриа илэрхийлсэн. Тэдний илэрхийлсэн байр суурь Засгийн газарт орж ажиллах тухайг хөндсөн, эргэлзээ төрүүлсэн тийм үйл явц байгаагүй. Харин Монголд улс төрийн хэлмэгдүүлэлт бий болж буйг ярьсан байсан.