Энэтхэг улс энэ удаагийн олимпод спортын 13 төрөлд 83 тамирчнаа өрсөлдүүлж байна. Сүүлийн үед хүч түрэн гарч ирж байгаа Энэтхэгийн боксчид 7 жинд өрсөлдсөнөөс 2 нь медалийн төлөө өрсөлдөх болжээ. Тэр хоёр боксчны нэг нь Бээжингийн олимпийн мөнгөн медальт Пүрэвдоржийн Сэрдамбыг Дондоны рингэн дээр 16:11 оноогоор буулган авч дуулиан тарьсан Лайшрам Девендро Сингх.

  Хорьхон настай энэ залуу улсынхаа 1,2 тэрбум хүнийг төлөөлж Лондоны олимпод ирсэн юм. Эхний тойрогт Гондурасын боксчинг ялсан Девендрог Монголын П.Сэрдамба арчаад өнгөрнө гэж бокс сонирхогчид таамаглаж байлаа. Түүний намтарт Энэтхэгийн хэд хэдэн тэмцээний аваргаас өөр олон улс, тив, дэлхийн медаль үгүй. Энэтхэгийн хэвлэлд Девендрогийн тухай “Девендро Сингх сүүдрээс шөнийн ханхүү шиг ил гарч ирэв. Эхлээд тэр олимпийн мөрөөдлөө бээлийндээ нуусан энгийн л нэг энэтхэг байв.
 
  Маш ширүүн өрсөлдөөнтэй хөнгөн жингийн тулаанд түүнд боломж бий гэж хэн ч хараагүй биз ээ. Энэ бүхнийг өөрчлөхөд түүнд 2 минут 24 секунд хангалттай байлаа. Эхний тойрогт Гондурасын Фигеораг ялахад шүүгч хүртэл гайхсан инээмсэглэлээ нууж чадахгүй байсан юм. Тэрээр маш хурдан бүхний хайрыг татаж эхлэв. Хар салхи шиг чөлөөт сэтгэлтэй боксчин болжээ, тэр” хэмээн бичиж байв.
Лайшрам Девендро Сингх 1992 оны 3 сарын 2-нд Мьянма буюу хуучин Бирмтэй хил залгаа Энэтхэгийн зүүн хойд Манипур мужид төржээ. Түүний гадаад төрх хинди гэхээсээ илүү монголжуу. Үнэндээ тэр төвд, бирм хэлний бүлэгт багтах манипури хэлээр ярьдаг  манипури үндэстэн учраас тэр.

   “Манипураас гаралтай, 19 настай Девендро ямар ч дүрэм журмыг дагах дургүй гудамжны дүрсгүй зодоонч шиг. Гэвч түүний “солиоролд” далд арга зүй бий. Шинжлэх ухаан түүний өвөрмөц арга барилыг тайлахгүй” гэж нутгийнх нь хэвлэлүүд мань эрийг “хөөргөж” байна.
Девендро тэр бүр бусад боксчдод байдаггүй замаар буюу эгчийгээ дагаж бокст хөл тавьжээ. Девендрогийн эгч Сушила Деви Энэтхэгийн эмэгтэй боксын аварга болж байсан бөгөөд одоо дүүгийнхээ идэвхтэй зөвлөгч. Анхны багш гэсэн хүснэгтэд албан ёсоор эгчийнх нь нэр байдаг. “Би их сайхан гэр бүлтэй. Эгч маань миний шинжээч хийдэг. Миний бүх тоглолтыг алдалгүй үзнэ. Youtube дээрээс өрсөлдөгчдийн маань бичлэгийг үзэж стратеги боловсруулахад бас тусалдаг” гэж П.Сэрдамбыг ялсан энэтхэг залуу” India times” сонинд ярьжээ.

  2011 оны Бакугийн дэлхийн аваргаар шигшээ наймд шалгаран олимпийн эрх авсан Энэтхэгийн олимпийн боксын найдвар манайхаар бол “Алдар” нийгэмлэг буюу Пүүн хотын армийн спортын хүрээлэнгийн нэрийн өмнөөс зодолддог. Баку явж дэлхийн аврагд өрсөлдөхийн тулд Армийн спортын хүрээлэнгийн сорилго дээр Азийн аваргын мөнгөн медальт Нэнэо Сингхийг тэр ялсан юм. Олимпийн өмнө өгсөн ярилцлагадаа тэрээр “Би өдөр болгон аавтайгаа утсаар ярьдаг. Аав маань намайг Манипурын анхны олимпийн медальтан болохыг хүсдэг болохоор үргэлж урам зориг өгч байдаг” гэж ярьжээ.
Маргааш олимпийн хүрэл медалийн төлөөх тоглолтод түүнийг 2008 оны олимпийн хүрэл медальт, 2010 оны Европын аварга, Ирландын боксчин Пэдди Барнс хүлээж байна.
  -Түүнийг бид сайн мэднэ. Дублинд бидэнтэй хамт 10 хоног бэлтгэл хийсэн нөхөр л дөө. Бид олимпийн бэлтгэлд нь тусалсан юм гэж Ирландын шигшээ багийн дасгалжуулагч Билли Уолш хоржоонтойхон хэлж байна.  “Их тэсрэлттэй тоглодог залуу. Манай Пэдди тэр хоёр хол зөрөөгүй тоглоно байх. Ямартай ч сонирхолтой байх болно” гэж ноён Уолш амлав.
Хэрвээ Девендро Сингх маргааш “Эксел” ордонд  Пэдди Барнсыг дийлбэл Энэтхэгийн боксын түүхэн дэх олимпийн хоёр дахь медалийн эзэн болно. 1900 оноос хойш 100 гаруй жил олимпийн наадамд оролцохдоо энэ агуу гүрэн ердөө 23 медаль аваад байгаа юм. 2008 онд Бээжинд боксын анхны хүрэл медалийг 75 кг-ийн жинд өөр нэгэн Сингх буюу Вижендер Сингх авч байв. Вижендер Сингх энэ удаа ч шигшээ 8-д үлджээ. Одоогоор Энэтхэг улс “Лондон 2012”-оос 2 хүрэл, 1 мөнгөн медаль аваад байна.
  П.Сэрдамб ын буухиаг тасалсан энэтхэг залуугийн тухай товчхон өгүүлбэл ийм байна. Пэдди Барнсыг ялж чадвал тэр өмнөх олимпийн хоёр ч медальтныг дийлсэн, тохиолдлын бус тамирчин гэдгээ нотолно. Цаана нь 2008 оны олимпийн аварга, 2011 оны дэлхийн аварга Жөү Шинмин, Казахстаны Биржан Жакипов хоёрын хэн ялсан нь  хүлээж байх болно. П.Сэрдамба, Солонгосын Шин Жонхан нар мултарсан болохоор Оросын Давид Айрепетян, Хятадын Жөү Шинмин хоёрын хэн нэг нь Лондонд төрийнхөө дууллыг эгшиглүүлэх магадлал хамгийн их гэхэд нэг их хол “буудсан” болохгүй биз ээ.