Салан тусгаарлах үзэл хүчтэй байдаг Шинжаан-Уйгарын өөртөө засах орны нийслэл Өрөмчид хот хоорондын автобусаар зорчигчдод аюулгүй байдлын нэмэлт арга хэмжээ хэрэгжүүлэх болжээ. Тухайлбал, билет авахын тулд заавал өөрөө бичиг баримттайгаа бичүүлнэ. Тийз худалдагч нь зорчигчийн иргэний бичиг баримтын хуулбар зэрэг дэлгэрэнгүй мэдээллийг цааш нь хадгалах ажээ. Замын хөдөлгөөний аюулгүй байдлыг сайжруулах зорилгоор гэж Хятадын албан ёсны хэвлэлүүд хэлж байгаа ч энэ нь байн байн тусгаар болох бослого хөдөлгөөн гаргаж байдаг уйгаруудын тэмцлээс сэрэмжилсэн хэрэг гэж ажиглагчид үзэж байна.
Энэ оноос хэрэгжүүлж эхлэх шинэ журмаар автобусаар зорчигчдын ачаа тээшийг ч чанд шалгах хатуу дэгтэй болжээ. Таяг, шүхэр зэрэг эд зүйлсийг эзнээс нь хураан бүртгэж нарийн шалгасны дараа унаанд нь суулгах юм.
Шинжаан-Уйгарын өөртөө засах оронд муслим шашинтай 8 сая уйгар болон хүн амын тоогоор 6 дугаарт ордог 200 мянган монголчууд амьдардаг. Монголын “Аэромонголия” компани Ховд хотоор дамжин тус өөртөө засах орны нийслэл Өрөмч рүү нислэг үйлддэг байсан ч түр зогсоогоод байна.