“Бэтмэн” киноны нээлтийн үеэр үзэгчдэд халдан, 12 хүний амийг хөнөөж, 58 хүнийг бэртээсэн аймшигт хэрэг АНУ-д хэдхэн хоногийн өмнө гарч, дэлхий дахиныг цочролд оруулсан билээ. Гэтэл уржигдар буюу өнгөрсөн ням гарагт тус улсын Висконсин мужийн Оак Грек хот дахь Сикх сүм рүү гал нээсэн хэрэг гарсан байна. Энэхүү халдлагаар долоон хүн нас барж, гурван хүн бэртсэн гэсэн мэдээг албаныхан өглөө. Уг хэргийг үйлдсэн этгээдүүд сүмд нуугдаж байсан бөгөөд одоогоор халдлагыг ямар шалтгаанаар үйлдсэн нь тодорхойгүй байгаа юм. Сикх сүмд ням гараг бүр номлол болдог бөгөөд нийтдээ 400 гаруй гишүүнтэй сүмд халдлага гарсан өдөр нийтдээ 100 гаруй хүн ирсэн байжээ. Халдлага итгэгчдийг өдрийн хоолоо идэхээр бэлдэж байх үеэр нь гарсан бөгөөд амиа алдагсдын дөрөв нь сүм дотор, гурав нь гадаа буудуулан нас барсан хэмээн цагдаагийн албаны төлөөлөгч хэллээ. Дээрх сүм 15-р зуунд Хойд Энэтхэгийн Сикх шашинт оршин суугчдын шаардлагаар баригдаж байсан гэнэ. Дийлэнх Сикхүүд  Энэтхэгт амьдардаг бөгөөд мөн Их Британи болон Хойд Америкт маш олон итгэгч байдаг байна. Цагдаагийн албаны даргын хэлж буйгаар, дээрх сүм ням гарагт өглөөний 10.25 цагт онгойсон бөгөөд халдлага үд дундад гарсан байна. Цагдаа нар энэхүү хэргийг үйлдсэн этгээдийг нэг хүн хэмээн тооцоолж байгаа юм. АНУ-ын Ерөнхийлөгч Барак Обама хохирогчдын ар гэрийнхэнд гүн эмгэнэл илэрхийлээд хэргийг үйлдсэн этгээдийг олоход бүхий л талаар туслахаа амлалаа. Мөн тэрбээр “Сикхчүүд Америкийн гэр бүлийн нэгэн хэсэг юм” хэмээн өнгөрсөн ням гарагт хохирогчдын ар гэрийнхэнтэй уулзах үеэрээ хэлжээ.