Баруун таван аймаг болон Архангай, Баянхонгор, Өвөрхангайд зам, гүүрийн 13 ажил хийгдэж байна. Тухайлбал, Завхан аймгийн Их-Уул сумын Идэрийн голын дээгүүр 169 метр урт төмөр бетон гүүр барьж байна. Энэхүү гүүрийг ирэх аравдугаар сарын 30-нд ашиглалтад өгнө. Одоогоор гүүрийн хоёр захын болон завсрын тулгуурын худгийг цутгаж, суулгасан. Увс аймгийн Наранбулаг-Хяргас нуур чиглэлийн 85 км авто замын газар шорооны ажил 95 хувьтай, гүүр хоолой, хиймэл байгууламжийн ажил 45 хувьтай байна. Уг замыг БНХАУ-ын “Шинжиан Шин Фа” ХХК барьж байгаа. Ирэх арваннэгдүгээр сард манай талд хүлээлгэн өгөх юм байна. Мөн Азийн хөгжлийн банкны санхүүжилтээр Манхан-Ховд чиглэлийн 85.3 км авто замын ажлын далан ухах ажил 93 хувьтай, суурийн доод үе 33 хувьтай явж байна. “Чайна гоузуба” компани гүйцэтгэгчээр ажиллаж байгаа. Энэ сарын 15-ны дотор багтааж хучилт хийж эхлүүлэх үүрэг өгсөн. Увс аймгийн Тариалан суманд баригдаж буй Тээлийн голын 75 метр урт төмөр бетон гүүрийг ирэх сард хүлээлгэн өгөхөөр “НКВ интернэйшнл хол динг” ХХК ажиллаж байна. Одоогоор гүүрийн суурь, тулгуур, ригель, дам нуруунуудыг угсарч, цутгаж дууссан ажээ.