Орхон аймгийн долдугаар сарын статистик үзүүлэлтүүд өсөлттэй гарчээ. Тодруулбал, Аймгийн төсөвт 52.9 тэрбум төгрөгийн орлогыг төвлөрүүлж, төсвийн гүйцэтгэл 112.3 хувьтай байгаа аж. Татварын орлогын төлөвлөгөө 20.2 хувиар, татварын бус орлого 4.2 хувиар давж биелжээ.

Орон  нутгийн төсвөөс төлөвлөгөөт санхүүжилтийн 77.4 хувийг буюу 48.4 тэрбум төгрөгийн зарлага санхүүжилт хийсний нийгмийн даатгалын  шимтгэлд 3.9 хувь, хөрөнгийн зардалд 11.4 хувь, бараа үйлчилгээний зардалд 20.9 хувь, татаас ба урсгал шилжүүлэгт 31 хувь, цалин хөлсөнд 32.7 хувийг тус тус зарцуулжээ.

Салбарын хувьд эдийн засгийн бусад салбарт 0.6 хувь, эрүүл мэнд, спортын салбарт 2.1 хувь, ангилагдаагүй бусад зардалд 11.4 хувь, нийгмийн даатгал, нийгмийн халамжийн салбарт 14.3 хувь, боловсрол, соёл урлагийн салбарт 33.9 хувь, нийтийн ерөнхий үйлчилгээнд 37.7 хувийг зарцуулсан байна. Өмнөх оны мөн үеэс нийт зарлага санхүүжилт 14.5 хувиар, орлого 18.0 хувиар их гарсан байна.

Монгол банкны мэдээгээр 995.4 тэрбум төгрөгийг гүйлгээнээс татаж, 1.0 их наяд төгрөгийг гүйлгээнд гаргажээ. Өмнөх оны мөн үеэс гүйлгээнээс татсан төгрөгийн хэмжээ 14.9 хувиар, гүйлгээнд гаргасан төгрөгийн хэмжээ 13.8 хувиар их байна. Иргэдийн хувийн мөнгөн хадгаламж  230.5 тэрбум төгрөгт хүрч, аймгийн нэг хүнд дунджаар 2.267.137төгрөгийн, нэг хадгаламж эзэмшигчид 2.064.712 төгрөгийн хадгаламж ногдож байна. Өмнөх оны мөн үеэс хадгаламжийн үлдэгдэл 19.5 хувиар, хадгаламж эзэмшигчийн тоо 2.5 хувиар нэмэгджээ.

Нийт 1218 ажлын байр бий болсны 52.9 хувь нь шинэ ажлын байр байна. Нийт бий  болсон ажлын байрны 18.9 хувь нь худалдааны  салбарт, 17.6 хувь нь үйлчилгээний  бусад  үйл ажиллагааны  салбарт, 15.3  хувь  нь боловсруулах үйлдвэрлэлийн салбарт, 8.8 хувь нь боловсролын салбарт, 8 хувь нь зочид буудал, зоогийн газарт, 7.9 хувь нь эрүүл  мэндийн  салбарт, 1.7 хувь нь тээврийн салбарт бий болжээ. Өмнөх оны мөн үеэс нийт бий болсон ажлын байр 62.4 хувиар, шинэ ажлын байр 2.6 дахин буюу 395-иар их үзүүлэлттэй гарчээ.

Б.Лхам