УИХ-ын гишүүн Ц.Даваасүрэнтэй цаг үеийн асуудлаар ярилцлаа.

-Ёсзүйн дэд хороо өнөөдөр хуралдах байсан ч дахиад л хуралдсангүй. Өнөөдрийн улс төрд үүссэн нөхцөл байдлыг та юу гэж харж байна?

-Тал талаасаа гарц хайя. Төрийн үйл ажиллагааг тасралтгүй үргэлжлүүлье гэдэгт оролдлого хийж байна. Ерөнхийлөгчийн санаачилсан хуулийн төслийг хэлэлцэх асуудлыг хэлэлцээд явах байх. Хэрвээ ямар ч гарц гаргалгаагүй ийм байдалтай удаан үргэлжилбэл УИХ тарах тухай асуудалд орох гээд байна. УИХ хуралдах чадамжгүй болсон тохиолдолд тарах нөхцөл бүрддэг. Олонх гишүүн хуралдаа суухгүй болохоор чадамжгүй болчихоод байна. Эндээс үзвэл, УИХ-ын дарга огцрох эсвэл УИХ тарах гэсэн нөхцөл байдал үүссэн гэж хэлж болно. Үүнийг шийдэх гэж Ерөнхийлөгч хуулийн төсөл оруулж ирсэн. Хэлэлцээд нэг тийш нь асуудлыг шийдэх нь зөв.

-Хуулийн төсөл батлагдахад тодорхой хугацаатай. Асуудал шийдэгдтэл хугацаа шаардах юм биш үү?

-УИХ-ын бүтцийн асуудал учир УИХ үүнийг өөрөө шийдэх бүрэн боломжтой. Бусад хуулийн төслийг хэлэлцэхэд тодорхой цаг хугацаа шаарддаг. УИХ-ын асуудлыг Засгийн газраас санал авахгүй явах боломж нь Дэгийн тухай хуулиар зохицуулагддаг учир үүнийг шийдээд явах ёстой. Ер нь эрх мэдлийн төлөөх улс төрийн тэмцэл гэхээс илүүтэй нийгэм зарчимтай шударга ёсны төлөө шаардлага тавьж байна гэж харах ёстой. Нам доторх хагарал гэхээс илүү зарчимтай амьдарч сурцгаая гэдэг асуудал. Хулгай луйвар, шударга бус байдалд цэг тавъя. Хариуцлагатай байя. Хариуцлагатай уул уурхайг бодлоготой хөгжүүлье л гэсэн зүйл. Үүнийг эрх мэдлийн тэмцэл мэт харагдуулахгүй байхыг хүсэе.

-Ерөнхийлөгчийн өргөн барьсан асуудлыг хэлэлцэхэд ямар хүндрэл тулгарах бол?

-Ирц хүрэх эсэх нь асуудал болох болов уу.

-Хөвсгөлийн Могойн голын уурхайд асуудал үүссэн гэх мэдээлэл бий. Яг ямар асуудал үүссэн юм бол?

-Хөвсгөлийн Олон овоотын орд гээд Могойн голын орд байдаг юм. Ухаа худаг шиг өндөр чанарын коксжсон нүүрстэй орд л доо. Сүүлийн үед Уулын баяжуулах “Эрдэнэт” үйлдвэрээр дамжуулж экспортод гардаг нэг хэсэг шуналтай хүмүүсийн бизнес болсон байна лээ. Өдөрт 70-80-иад хүнд таацын машин нүүрс зөөж эхэлсэн. Энэ нь байгаль орчин болон Эрдэнэтийг холбосон хар замд сөргөөр нөлөөлж эхэлсэн. Үүнээс гадна хүнд даацын машин олноор явснаас болж гүүрнүүд суулт өгч эхэлсэн. Өндөр үнээр цаг хугацаа зарцуулж байж босгосон дэд бүтэц нүүрсний компаниудын шуналаас болж дуусч байна. Энд аймаг орон нутгийн удирдлагууд анхаарал хандуулж ажиллах хэрэгтэй. Миний зүгээс “Хар замын асуудлыг шийдэхгүй бол болохгүй болсон байна шүү” гэдгийг холбогдох албаныханд хэлсэн. Тээвэрлэлтийн асуудалд тодорхой арга хэмжээ авах болов уу. Аймгийн мэргэжлийн хяналтын газраас зогсооз эхэлсэн гэсэн. Энд цаашид бүрэн цэг тавихын тулд холбогдох төрийн байгууллагууд ч шийдвэрээ гаргах ёстой.

-Тэгэхээр аймгийн төв хүртэл шороон замаар тээвэрлэлт хийж байгаа гэж ойлгож болох уу?

-Болно. Тэнд тоос тасуулсан машинуудын цуваа үүсч эхэлсэн байна. Дэлгэрмөрөний баруун талын сумтай хиллэсэн гүүр нь нь суулт өгч, багана нь хазайсан. Тиймээс зогсоох нөхцөл үүссэн гэж болно. Энэ нь цааш үргэлжилвэл Өмнийн говь шиг цуваа үүснэ.

-Хэдий хэр хугацаанд зогсоох бол?

-Мэргэжлийн хяналтын газар холбогдох байгууллагуудтай хамтарч түр хугацаанд зогсоосон. Гэхдээ үүнийг цаашид урт хугацаацаагаар зогсоох ёстой. Тэгэхгүй бол байгаль орчинд маш их сөрөг нөлөө үзүүлнэ. Мөн дэд бүтцийн асуудал, зам, гүүр сүйднэ.

Р.Хишигжаргал