Эрдэнэтийн 49 хувийг Сингапурт зарах тухай мэдээлэл өнөөдрийн улс төрд өрнөж буй халуун сэдвийн нэг болоод байна. Тодруулбал, УИХ-ын гишүүн Л.Оюун-Эрдэнэ, Х.Нямбаатар, Л.Болд, Т.Аюурсайхан, Ж.Батзандан нар мэдээлэл хийх үеэрээ “Монголиан Копр Корпорейшн” компани удирдах зөвлөлийн хурлаараа Эрдэнэтийн 49 хувийг Сингапурт зарах тухай шийдвэр гаргажээ. Энэ тухай мэдээлэл нэрээ нууцалсан эх сурвалжаас ирсэн. Хэрэв ийм асуудал байвал зогсоох ёстой. Мөн орд газруудыг тойрсон олон асуудал бий. Энэ тухай нээлттэй сонсгол хийж мэдэгдсэн.

Тэгвэл гишүүдийн хэлсэн уг асуудал үнэний ортой байх магадлал юм байна. Учир нь Хууль зүй, дотоод хэргийн сайд Ц.Нямдорж уг асуудлаар “Парламент” телевизид өгсөн мэдээлэлдээ “Энэ асуудлыг дахин Засгийн газраар ярина” гэсэн тайлбарыг өгчээ. Сайдын хэлсэн энэ үгнээс үзэхэд уг асуудал өмнө нь Засгийн газраар хэлэлцэгдэж байсан байх магадлалтай аж.

Түүнчлэн Эрдэнэтийн 49 хувийн асуудлыг УИХ-д өргөн мэдүүлэлгүй, нэг үгээр хэлбэл, олны нүднээс нууцаар гаднын улсад зарах гэж байсан нь ч үнэний ортой бололтой. Уг нь 2017 оны намрын чуулганаар Эрдэнэтийн 49 хувийн асуудал хэлэлцэгдэж, төр өөрийн мэдэлдээ авсан. Энэ утгаараа төрийн мэдлийн өмчийг дур мэдэн зарж, борлуулж болохгүй гэдгийг УИХ-ын гишүүн Д.Дамба-Очир тайлбарлаж байсан.

Тэрбээр “Надад гэрээний тухай, эрх олгосон утга бүхий цаас өгсөн. Хэрэв Сингапурт зарж байгаа бол энэ байж болохгүй асуудал. Тиймээс үүнийг онцгой анхаарах хэрэгтэй гэдгийг холбогдох байгууллага руу нь хэлсэн. Шалгаж үзээд, нягталж байж ярихгүй бол болохгүй. Тухайлбал, саяхан “Эрдэнэтийн хүү” цэрэгт амь насаа алдчихлаа. Өчигдөр цэрэг, цагдаа, эмнэлгийнхнийг газар дээр нь очиж үз гэж явуулсан. Энэ асуудлаар ч анхаарч байна. Цэргийн албанд очсон хүүхдийг зодно гэдэг байж болохгүй асуудал. Амь насанд нь хүрнэ гэдэг бүр байж болохгүй асуудал учраас шалгалтын дүнг харж байгаад тайлбар өгнө.

Эрдэнэтийн 49 хувийн асуудал яагаад хууль бус байна гэхээр УИХ-аар ороогүйд байгаа юм. Засгийн газраар нууцлалын зэрэглэлтэй гэж оруулсан болоод л шилжүүлсэн асуудал. Энэ бол стратегийн орд учраас заавал УИХ-аар оруулж ирэх ёстой. УИХ-ын эрх мэдлийн асуудал юм. УИХ-ын шийдвэр, Үндсэн хуулийн Цэцийн шийдвэр ч гарсан. Хэрэв уг асуудлыг УИХ-аар оруулбал Сингапур эсвэл өөр улсад, компанип зарагдах зүйл яригдахгүй” гэсэн юм.

Ямартай ч гишүүдийн хэлж буйгаар уг асуудал огт оргүй биш бололтой. Ард түмний эрх ашигийн төлөө гэх дархлагдсан үгний дор хэний эрх ашиг яваад байна вэ. Д.Дамба-Очир гишүүний хэлсэнчлэн Засгийн газраар нууцын зэрэглэл гэх нэрээр яригдсан болоод л өнгөрсөн нь үнэн бол асуудал дагуулаад байгаа бусад  лицензтэй холбогдох наймааны асуудал хэрхэн өрнөдөгийн илрэл болох нь ээ.

Б.Лхам