Монголчууд байтугай дэлхий андахаа байсан 2009 оноос угшилтай Оюутолгойн хөрөнгө оруулалтын гэрээ болон Дубайн гэрээний эргэн тойронд өрнөсөн хэргийн хөөн хэлэлцэх хугацаа хэдхэн сарын дараа дуусах гэж байна.

Хэргийн эх үндэсийг тавьсан, хань хамсаатан гэх Ерөнхий сайд асан С.Баяр, Ч.Сайханбилэг болон Сангийн сайд асан С.Баярцогт нарыг Оюутолгойн хөрөнгө оруулалтын гэрээг үзэглэхдээ эрх мэдэл, албан тушаалын байдлаа урвуулан ашиглаж, бусдад давуу эрх олгосон байж болзошгүй гэх үндэслэлээр буюу Эрүүгийн хуулийн 22.1 дүгээр зүйлд зааснаар яллагдагчаар татан шалгаж, хэргийг шүүхэд шилжүүлээд байгаа. Гэвч Ерөнхий сайд асан Ч.Сайханбилэг нь БНСУ-д эмчилгээ хийлгэх зорилгоор хилээр гарснаас хойш өдийг хүртэл эргэж ирээгүй байгаа юм. Тэрбээр өдгөө АНУ-д байгаа бөгөөд Монголд авчрахын тулд шүүхээс дайчлан баривчлахыг зөвшөөрсөн захирамж гаргаж, үүнийг үндсэн дээр интерполд хандах учиртай. Шүүхийн захирамжийн дагуу интерполь Ч.Сайханбилэгийг албадан баривчлах боломж хуулийн хүрээнд бий.

АТГ-аас Ч.Сайханбилэгийг 2019 ондоо багтааж, Монголд ирэхгүй бол дээрх боломжийг ашиглана гэж мэдэгдэж байсан. Тэгвэл он гараад хоёр өдөр өнгөрлөө. АТГ-аас аль ч дүүргийн шүүхэд түүнийг дайчлан баривчлахыг зөвшөөрсөн захирамж гаргуулах хүсэлт гаргаагүй байна. Энэ талаар прокурорын байгууллагаас тодруулахад мөн л “ийм хүсэлт ирээгүй” гэв.

Дээрх хэлсэнчлэн Оюутолгойн хөрөнгө оруулалтын гэрээний хэргийн хөөн хэлэлцэх хугацаа 2020 он буюу энэ оны дундуур дуусна. Ийн хэлсэн учир нь Дубайн гэрээг 2015 онд үзэглэсэн. Энэ үе хүртэл хэргийг бүрэн төгс хэрэгжсэн гэж хэргийн материалд хавсаргасан байгаа аж. Тэгэхээр хэргийн хөөн хэлэлцэх хугацаа 2015 оноос тоолохоор 2020 онд дуусах нь.

Ингээд үзвэл, Ерөнхий сайд Ч.Сайханбилэг хэр удаан нуугдаж, зугтаж чадна. Тэр хэрээрээ өөрт нь болон С.Баяр болон С.Баярцогт нарт ашигтай юм. Тиймээс АТГ-ынхан шүүхэд яаралтай хандаж, захирамж гаргуулан интерпольд хандахгүй бол авлига, албан тушаалтанд холбогдох хэрэг замхардагын тод жишээ нь Оюутолгой болох нь байна шүү.  

Өмнөх нийтлэлийг https://www.24tsag.mn/a/178241

Г.Нацаг-Эрдэнэ