УИХ-ын чуулганаар Үндсэн хуулийн цэцэд маргаан хянан шийдвэрлэх ажиллагааны тухай хуулийн 15.4 дэх Цэц зөвхөн Үндсэн хууль хүчин төгөлдөр болж үйлчилсэн хууль тогтоомж болон албан тушаалтантай холбоотой маргааныг хянан шийдвэрлэнэ гэж заасан нь Үндсэн хуулийн 64.1, 70.1 дэх заалтыг зөрчсөн гэж үзсэн Үндсэн хуулийн цэцийн энэ сарын 21-нд гаргасан дүгнэлтийг хүлээн авах боломжгүй гэж үзлээ. Гишүүдийн зүгээс Эрдэнэт үйлдвэрийн 49 хувьтай холбоотой маргааныг Цэцийн гишүүд тодорхой бүлэг этгээдтэй хуйвалдаж, компанийн эрх ашигт үйлчилж байна гэж шүүмжилсэн бөгөөд Эрдэнэт үйлдвэр төрийн болон ард түмний нийтийн өмч байх ёстой гэсэн байр суурийг илэрхийлж байлаа. Ингээд гишүүдийн байр сууриас хүргэж байна. 

Л.Оюун-Эрдэнэ: Чоно борооноор гэдэг шиг зүйл өнөөдөр болж байна. Эрдэнэтийн 49 хувьтай холбоотой асуудал Цэц дээр бий. Арай ч ингэтлээ Цэцийг дампуурахгүй байх гэж найдаж байсан. Цэцийн хэдэн нөхдүүд улсад нэг их наяд төгрөгийн татвар төлдөг Эрдэнэт үйлдвэрийг ингэж оруулж ирж байна. Нэг жилийн хугацаанд Эрдэнэт үйлдвэртэй холбоотой олон асуудал гарсан. Төрд тангарах өргөсөн субъектүүд хувийн компанид үйлчилдэгээ болимоор байна.

Төрийн мөнгөөр авсан үйлдвэрийг яагаад улсад байлгаж болохгүй байгаа юм бэ. Та нар яагаад ийм арчаагүй юм бэ. Энэ асуудлыг ийм байдлаар оруулж ирээд шийдэх гэж байгаад Их хурлын гишүүд анхаараарай. Кноп дарсан гишүүн бүрийг иргэд ажиглах ёстой. Энэ үйлдвэрийг ард түмэнд нь үлдээчихээч. Цэцийн гишүүд та нар турж үхэх гээд байгаа юм уу. Гишүүд ээ, та нар хүлээж авч болохгүй. Кноп дарсан нөхдүүд бүгд энэ асуудалтай холбоотой шүү. Хууль хяналтын байгууллагынхан хүртэл манай өрөөнд орж ирж дарамталж байсан асуудал гарч байсан. Энэ асуудлыг дэмжвэл үеийн үедхар толбо болж үлдэнэ шүү, гишүүд ээ. 

Б.Лхам