Монголын Морьт харваачид Монгол Төрийн их наадмын нээлтэд  8 жил дараалан оролцож  түмэн олноо баясгаж, Монголын уламжлалт  морьт харваа, намнааг дэлхийд гайхуулж явсан 18 хурдан хүлгээ алдсан харамсалтай хэрэг гараад, нийгмийг цочроож байна.

Тэгвэл Монгол Улсын шадар сайд, үндэсний их баяр наадмыг зохион байгуулах хорооны дарга Сайнбуянгийн Амарсайхан  морьт харвааны тамирчидтай уулзаж, сэтгэлийн дэм болгон халиун, хүрэн халзан  зүсмийн хурдан удмын 2 морь бэлэглэжээ.

Энэ тухай Монголын морьт харвааны багш Н.Алтанхуяг өөрийн цахим хуудаснаа нийтлэхдээ “ 18 хурдан хүлгээ алдсан бидний уй гашууг хуваалцаж хамгийн түрүүнд Монгол Улсын шадар сайд Сайнбуянгийн Амарсайхан өөрийн биеэр хүрэлцэн ирж, бидэнд сэтгэлийн дэм болгон халиун, хүрэн халзан зүсмийн хурдан удмын хоёр морь бэлэглэлээ.

Монгол өв соёл, Монгол адууны эд хавыг түгээн дэлгэрүүлэх их үйлсийг маань дэмжиж сэтгэлийн дэм үзүүлсэн танд морьт харвааны хамт олныхоо өмнөөс, Монгол адууг хайрлаж бахархдаг хүн бүрийн өмнөөс гүн талархал илэрхийлье.

Дэлхийг тамгалсан Монгол морьдын төвөргөөн үл тасрах болтугай.

Бидэн дээр ирсэн Монгол Улсын Шадар сайд, Үндэсний их баяр наадмыг зохион байгуулах хорооны дарга С.Амарсайханд танд гялайлаа. Монгол адууны босоо цагаан хийморь таныг үргэлж ивээх болтугай” гэжээ.